平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

地表最熱賣電動車Nissan Leaf

可能係最先進日本電動車Nissan Leaf

「電動車」

一個全世界車迷都正在談論嘅話題。

你有冇試過電動車?又或你已經加入成為一份子


對電動車一知半解嘅人,會以為Tesla就代表晒全地球嘅電動車,但係電動車嘅市場擴展得比Marvel宇宙更快,唔使10年已經喺香港遍地開花。仲記唔記得日本電動車嘅開荒牛—Nissan Leaf?2010年發表,2011年即奪得「European Car of the year」、「World Car of the Year」及「Car of the Year Japan」等大獎,風頭可謂一時無倆。9年過去,雖然Leaf喺香港唔算普及,但佢喺國際市場發光發熱,截至2019年3月,已經喺全球賣出超過400,000部,係電動車銷量王。

幾勁都好,初代Leaf始終已經舊,面對唔同對手挑機,第二代即時接捧,香港Nissan代理亦火速引入!新款Leaf唔單只外形更吸引,連用家最關心嘅舒適性、充電時間及續航力都有顯著改善,更重要係受惠於「一換一」計劃下可以免首次登記稅,入門版平到30萬有找,吸引!


唔單只車頂用上深藍色,連車尾擾流裝飾條都襯返色。


專「葉」電動車

早幾年電動車剛剛興起時,就算大車廠都只會以現有汽油版嘅車款改造而成,好似Nissan咁一嚟就搞部全新款式、擁有專屬車身嘅Leaf,真係幾罕見。「Leaf」呢個名從此成為Nissan嘅電動車代表。當對手嘅電動車仍停留喺初代或facelift階段,眼前嘅Leaf已發展到第二代,即係代表所有設計都會引用廠方最新、最先進嘅嘢,領先同級對手。新款Leaf沿用五門揭背設計,但車身線條比上代銳利,車頭用咗Nissan近年常用嘅「V-Motion」設計,加上測試車係頂級LUX版本,可以選用two tone車身色,主調係白色,車身上半則用深藍,非常醒神!LUX版本唔單只獨有two tone車身色,更用LED頭燈及LED日行燈,好用易區分。


只有LUX版本先可以配two tone車身色,而藍色車頂更只可配喺白色車身上。


215/50R17輪胎都用上節能款式,令Leaf有更高能源效益。


實用又舒適

Nissan設計Leaf嘅時候,冇打算將佢定性為高級房車,反而一切以實用行先,就算係LUX版本嘅車廂,都只係比普通版多咗皮座、電子泊車手掣及一系列電子安全系統(IAVM環視顯像系統、MOD動態探測系統及DAA疲勞駕駛提示),基本嘅車廂乘坐性完全一樣,後座空間充裕而且座墊夠厚,似坐落大梳化,而最值得一讚係車尾箱比想像中實用,後座背可以6:4摺疊之餘,載物空間更達435L,好使好用。

中控台設計比較普通,未用上頂級大mon.及全按鈕式冷氣系統,同目前最流行嘅大mon.中控台比較,實在唔夠吸引力,好彩錶板仲有啲心思,右邊用指針速度錶、左邊就用彩mon.,可以顯示大量行車數據,包括剩餘電量、充電時間、輸出功率及行車哩數等等。


真皮前座嘅邊沿都加上防跣物料,而且表面有好多透氣孔。


後座坐墊夠晒厚,有唔錯舒適性,長途車都唔怕。


尾箱有435L容量,連後座背都可以6:4分割摺疊,可用性更高。


其實新一代Leaf嘅駕駛艙比上代平實,少咗科幻味,更似Nissan其他車系設計。


錶板保留指針式速度錶,左邊先係多用途顯示屏。


新增e-Pedal功能

由上代開始,Leaf已經用一個圓形波棍掣,新一代都承襲呢個特點,頂部按鈕係P波,而正常D波之外仲有個B(Brake)波,就好似hybrid車嘅拖波掣咁。圓形波棍上方分別有「ECO」及「e-Pedal」兩個模式,「ECO」唔使多介紹,就係電腦控制令加速力下調,反應大概係正常嘅七成,反而「e-Pedal」模式可以話係今次新款嘅重點。廠方話「e-Pedal」系統開啟後,可將油門同迫力合二為一,踩油門時加速前進,只要一鬆開油門就有輕柔制動效果,直至剎停部車。你可能會話:「唓!咪好似以前啲電動車咁,又係一縮油就拖慢部車,有乜咁特別?」筆者試過「e-Pedal」系統一段時間,發覺加速力會比正情況下慢少少,而縮油時嘅拖慢感覺就好似平時揸車輕輕拖住個迫力咁,力度完全唔突兀,甚至可以緩緩收慢車速至完全停車,不論上斜或落斜都可以完全停定,而且當縮開油門一剎那,車尾剎車燈都會亮著,有警示後方車輛嘅作用,同以前嘅電動車唔同。筆者認為「e-Pedal」用作悠閒狀態下使用就最好,剎車力度不足以應急,所以駕駛者仍然要有準備急剎車時需要踩迫力。


「e-Pedal」系統係今代Leaf嘅重點功能,可以將油門與迫力合二為一。


增加續航力

上一代Leaf可以距今9年,咁多年來動力系統當然有改進,嚟到新一代換上新摩打,馬力輸出提升至150ps,連電池都換成40kWh容量,續航力由上代約160km大幅增至311km!用家可以更放心走長途!充電時間方面,由於電池容量大咗,所以充電時間都比以往長少少,以家用220V 10A充電,需時18小時由0-100%,而用CHAdeMO制式快充,就可以40分鐘完成0-80%。其實以Leaf現時嘅性能表現同續航力,已經適合更多士使用,但如果想用得開心又放心,最好都係屋企可以充電,唔好依賴公眾充電系統。

由於Leaf將所有電池平均平放喺車底,連波箱都非常細小,全車最高重心嘅機械部件就係車頭內嘅摩打,所以Leaf嘅轉彎重心頗低,車頭指向性準而且快,需未至跑車咁嘅級數,但配合埋摩打嘅強橫低轉加速力,只要有四條靚啲嘅胎,Leaf車主就可以喺好多彎路上搵到樂趣。


新一代摩打已有150ps馬力輸出,扭力更達至320Nm,加速表現比同上代有好大差別。


全車嘅電池都平放喺車廂底部,令車身重心更低。


充電位置設於車頭,可對應三種不同速度充電。


V-Motion車頭係Nissan近年嘅主要設計元素。


Nissan Leaf Spec.

馬達類型:同步三相交流

最大馬力:150ps

最大扭力:320Nm

電池容量:40kWh

續航距離:311km(NEDC模式)

充電時間: 標準18小時(220V 10A)、

中速8小時(220V 32A)、

快速40分鐘(CHAdeMO)80%電量

傳動:單速自動

車身:4,480 X 1,790 X 1,540(mm)

軸距:2,700mm

車重:1,520kg

車價:$299,315起(一換一)

查詢:合誠汽車(2803 5333)


Text:Chris

 覺得這文章有用?按下面的按鈕分享給你的朋友 

你可能感興趣的文章