平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

Mercedes-AMG GT 63 S 4MATIC+ 4 Door Coupé

639匹最強街車

Mercedes-AMG GT 63 S 4MATIC+ 4 Door Coupé


今次 <<OpenCar>> 介紹嘅車,新車車價差不多要3百萬,我知,介紹啲車唔夠貼地呀嘛,我哋有睇到你哋嘅留言。不過有時睇下普通嘢,有時又睇下高級嘢,咁先夠過癮㗎嘛!言歸正傳,今次我哋借咗 Mercedes 最強街車過嚟,全名就係Mercedes-AMG GT 63 S 4MATIC+ 4 Door Coupé,由於個名實在太長,請容許我以4門GT呢個簡稱嚟叫佢,呢部4門GT大有來頭,因為佢係繼SLS AMG 同 AMG GT Coupé ,第三部由 Mercedes-AMG 親自打理嘅車款。


Mercedes-AMG GT 63 S 4MATIC+ 4 Door Coupé 第三部由 Mercedes-AMG 親自打理嘅車款,不過新車價就唔太親民接近要300萬。


車廂入面

一坐上車,首先會見到個好有型嘅AMG Performance軚盤,佢除咗有好多鍾意改車嘅車主都渴望想要嘅猄皮軚環之外,右下角仲會有一個圓形控制器,佢可以用嚟顯示同選擇4門GT 6種唔同嘅駕駛模式。另外喺左下角嘅兩個按鈕,可以隨車主嘅喜好設定按鈕所控制的功能,例如調節避震嘅軟硬度、尾喉氣閥開關等等。比較以前 Mercedes 車款要喺中控先選擇到駕駛模式方便快捷咗好多。最後,軚盤上面左右兩邊有兩個黑色嘅按鈕,可以控制中間兩個12.3 吋嘅電子錶板同中控顯示屏。


4門GT嘅中控台設計其實大有來頭,佢嘅設計係對應返車頭副V8引擎,所以會係V字形又會有8個選擇按鈕,不過事實上 GT 車款都有用到呢個設計,不過4門GT嘅設計就更新咗,喺每個按鈕上面有一個細細嘅顯示器,話你知調校緊邊樣嘅設定。


除咗有好多較為高級車都有嘅氣氛燈之外,4門GT嘅冷氣出風位都有嘢玩,將冷氣溫度調高嘅時候,出風位嘅氣氛燈會轉成紅色。


相反,冷氣溫度調低嘅時候就會變成藍色,呢啲細節位部車都有照顧到。


至於呢部車嘅賣點,後座坐落去嘅感覺如何呢?雖然只得兩張櫈,坐落去都有少少似坐著賽車櫈嘅感覺,而頭頂空間大概有一個拳頭嘅空間,當調較好我嘅駕駛座姿之後,膝頭同前座之間大概有兩個半拳頭嘅空間,後座空間相當唔錯。車尾箱嘅容量有 395 L,行李箱底板下還有額外的 60 升容量。


後座座位坐上去有少少桶櫈感覺,坐得都幾舒服。


引擎入面嘅配備

其實4門GT 使用嘅4.0 公升 V8 Twin Turbo 引擎喺好多Mercedes 嘅車款都有出現,包括 C E S G Class嘅 63 或者 63S,不過喺眾多嘅型號入面,呢部車擁有最大馬力輸出 639匹,峰值扭力900Nm,0-100 公里/小時加速3.2秒,極速更加係有315公里/小時。


呢副4公升 V8 Twin Turbo 機器喺 Mercedes 唔同嘅車款已經出現過好多次,不過嚟到4門GT 就有暫時最強勁嘅設定(街車計)。


兩個雙渦旋排氣渦輪增壓器

用得Turbo 引擎,難免會有Turbo Lag 嘅問題,為咗減底Turbo Lag 4門GT 用咗兩個雙渦旋排氣渦輪增壓器(Twin Scroll Turbo),用雙渦旋技術之後好處係可以確保排氣流量可得到最好嘅利用從而提高動力輸出同扭力。


Drift mode甩尾模式

4門GT 車入面總共有6個行車模式:包括「Slippery」、「Individual」「Comfort」、「Sport」、「Sport+」同「RACE」。好似打機咁有個秘技玩,可以開啟一個隱藏Mode- Drift Mode(甩尾模式)出嚟,令部車由四驅變成尾轆車。


智能 AMG 汽缸管理系統

除咗上面提過嘅兩個雙渦旋排氣渦輪增壓器之外,車入面仲有一個智能 AMG 汽缸管理系統,當使用「Comfort」駕駛模式嘅時候,而引擎轉速又喺1,000 至 3,250 之間,8 個汽缸入面嘅 2、3、5 同8 號汽缸就會停用,從而降低燃料嘅消耗。不過我個人認為買得起部新車價超過300萬、同時馬力又超過 600 匹嘅車,好似冇咩理由要慳住用油喎。


車出面除咗套20吋軨,仲有個AMG獨家嘅鬼面罩,而鬼面罩下面有一個主動式擾流裝置AIRPANEL,有需要嘅時間會打開,等更多空氣進入引擎,不過如果要降低風阻都可以閂返。


當日試嘅車加咗AMG Exterior Carbon package I同埋AMG Exterior Carbon-Fibre package II,車外加咗碳纖飾件,好似車頭鏟同埋大大隻嘅尾翼等等,令部車睇落更惡,而呢兩個option 加埋已經接近20萬,所以總車價佢已經差唔多320萬。


行車表現

試車之後,會發覺呢部4門GT Turbo Lag嘅情況唔明顯,相信因為佢用咗雙渦流增壓器,所以已經將Turbo Lag 減到好低。至於動力輸出方面大約3,000轉左右動力依然非常充足,再加上AMG Speedshift 9G 9速波箱,除咗波段向上時候加速力非常強勁之外,掉轉Downshift時,波箱反應都係極之迅速,絕對唔會有拖泥帶水嘅感覺。


之前曾經都試駕過Mercedes 其他車款,特別是一些比較入門級嘅車款,例如C200 等等,軚感畀我嘅感覺比較輕。雖然4門GT 車長5米又重超過兩噸,但係軚感都好實在以及過彎亦都好靈活。4門GT同 AMG GT Coupé 最大分別就係前者係尾驅車而後者就係部四驅車,四驅好處大家都應該會知道,落雨濕地時抓地力更好、而出彎動力輸出比起尾驅車更早,最後就係四驅行車可以令安全性提高。


我自己係靚喉聲嘅追隨者,4門 GT 就係出自AMG,而AMG車其中一個賣點正正就係喉聲,結果當然冇令我失望,夠晒強勁,當鬆開油門嘅時間仲會有打炮聲添!


如果一定要喺雞蛋入面挑骨頭的話,我會話張Performance Seat,雖然佢將我緊緊咁包著,高速過彎時候唔會令我左搖右擺,不過佢嘅質料真係很硬,坐得太耐有幾會條腰會痛。 


好老實講,4門GT 有639 匹,喺香港合法嘅情況下真係用唔晒,再加上試車當日天氣不似預期。不過喺咁有限嘅條件之下試過呢部車,而佢都可以帶畀我非常強烈嘅感覺。如果有機會可以帶佢落賽車場的話,相信呢部Mercedes-AMG GT 63S 4MATIC+ 4 Door Coupé一定可以好好玩。


Mercedes-AMG GT 63S 4MATIC+ 4 Door Coupé 規格

引擎:3,982c.c.V8 twin turbo

馬力:639hp/5,500 - 6,500rpm

扭力:900Nm/2,500 - 4,500rpm

傳動:AMG SPEEDSHIFT MCT 9G

車身:5,054 X 1,953 X 1,442(mm)

軸距:2,890mm

重量:2,951 kg

0-100km/h加速:3.2秒

極速:315 km/h

車價:$2,998,000起

查詢:仁孚行(2895 7339)


Text: Daniel

Photo: Billy

 覺得這文章有用?按下面的按鈕分享給你的朋友 

你可能感興趣的文章