平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

SQ5 quattro試駕

可以租嘅強勁SUV

新車車價要81萬起嘅SQ5,未必人人都會願意畀錢買,不過如果可以畀錢玩下一個週末,甚至乎只玩一日,過下癮都係一個唔錯嘅選擇喎!如果你都有咁嘅諗法,Audi 租車計劃 「Audi on Demand」就非常適合你。其實喺外國已經行咗好耐嘅 Audi on Demand 除咗有好多唔同Audi 車款由S3 到 R8 都可以選擇之外,有別於一般嘅租車服務,還車時係唔需要入返油㗎,變相即係送咗一缸油俾你。以今次試嘅SQ5 為例,由星期五朝早開始到星期日晚,價錢係 $7,440,如果租一日價錢就係 $3,100。


加辣版嘅SQ5,馬力有354匹、最大扭力有500Nm。


01 5.4 秒

講返部SQ5,佢有一副3公升 V6 渦輪增壓引擎,馬力喺5,400 - 6,400轉之間有354匹(hp),峰值扭力1,370 - 4,500轉之間有500Nm。相比起普通Q5 兩公升直四引擎,多咗兩個汽缸之外仲多咗109匹同130Nm扭力。另外,SQ5配合 8前速 Tiptronic 波箱同quattro 四驅行車,所以即使呢部重量接近兩噸嘅SUV 0 - 100km/h 加速時間都只係5.4 秒。


行車表現

兩千轉或之前SQ5 表現真係令人會有少少失望,Turbo Lag 問題頗為嚴重,雖然字面上最大馬力只係會喺5,400 轉(較後段先出現),不過實際上過咗兩千轉已經係另一回事,兩千轉之後動力已經非常強勁,直路沖刺好勁,推背感十足,所以如果想保持部車有好醒神嘅表現,入Sport 模式一定係不二之選。


如果轉用返Comfort 模式時候行車就會好寧靜,軚感喺呢個模式下我會形容佢係「超、級、輕」,對於我嚟講軚感有少少過輕,好似冇晒駕駛樂趣。雖然軚感係輕,不過佢非常敏感,再加上SUV車有嘅高視點,唔怕畀其他車阻住視線之餘,由窄位掉頭到泊車都好易,好適合喺城市入面使用。


SQ5 車長4,671mm,闊1,893mm,體積唔太大部、好易睇位,經過尖沙咀鬧市人多車多嘅情況下都唔覺得大壓力。至於避震方面,試車前會以為佢會唔夠硬,不過係意料之外比較硬淨,所以轉彎時都算穩定,唔會因為車身高度令到過彎車身傾斜得好犀利,相反又係咪表示佢吸震能力唔高呢? 事實又唔係,特別用Comfort 模式時路過凹凸不平嘅路面時唔會覺得好唔舒服,所以SQ5 避震軟硬度算適中。最後就係制動方面,迫力唔夠收恐怕係SUV車幾普遍嘅問題,如果想迫力應少少可以考慮下畀錢升級。整部車令我最有驚喜嘅地方係縮油後會有打炮聲,悶悶地踩兩腳,聽下聲娛樂性都幾高。


內籠方面

至於車籠入面,如果你係一個Audi 或者係 Volkswagen Fans,一上駕駛席基本上你會極速上手,D型三幅式軚盤上所有嘅按鈕佈局以至中控嘅操作你自自然然非常清楚,而車入面有嘅其他裝備例如7吋嘅電子錶板、7吋嘅中控顯示屏、三區恆溫冷氣同電動尾門。


後座感覺少少似坐賽車櫈,所以有少少硬,不過相比起一般後座座位會覺得包好多。空間方面,以5尺8吋高計,調較好駕駛坐姿之後,前座同我膝頭有兩個半拳頭左右嘅空間,另一方面,頭頂空間真係唔多,只有四隻手指左右,不過由前座一直去到後座嘅天幕天窗減少好多壓迫感。


SQ5 配備quattro 四驅系統,令行車更加穩定。


制動系統可能要升級先可以滿足較激進嘅揸車方式。


7吋嘅電子錶板,三幅式嘅D型軚環加轉波撥片。


車入面四個座位都有鑽石型嘅車線,係S Line 車款入面獨有。


天幕天窗由車頭一路申延去到後座頭頂,令壓迫感大減。


尾箱容量有550公升,另外尾門係電動所以搬行李時會更加方便。


SQ5 用一副3 公升 V6 Turbo 引擎。


SQ5 quattro規格

引擎:2, 995c.c. V6 渦輪增壓引擎

馬力:354hp/5,400 - 6,400 rpm

扭力:500Nm/ 1,370 - 4,500 rpm

傳動:8前速 Tiptronic 自動波

驅動:前置引擎、四驅

車身(長x闊x高):4,671 x 1,893 x 1,635mm

軸距:2,824mm

車重:1,945kg

售價:$811,000起

查詢:Audi Hong Kong(3465 0000)/ Audi on Demand (3665 9380)


Text: Daniel

 覺得這文章有用?按下面的按鈕分享給你的朋友 

你可能感興趣的文章