平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

成也「Supra」、敗也「Supra」

GR Supra

成也「Supra」、敗也「Supra」



相隔差不多20年同時亦係一部非常令人注目嘅日本車款- 全新 Toyota GR Supra 終於抵達香港。相信有唔少嘅車迷都好渴望想知呢部「德日混血兒」表現到底如何。


由 Toyota(豐田)同 BMW(寶馬)共同合作嘅 GR Supra 同 BMW 嘅 Z4可以算係孖生姐妹,因為包括引擎(B58)、底盤同波箱都係寶馬出品而且共用,不過外型同setting 就各有各做。以外觀設計為例除咗兩隻側鏡之外,絕大部分都係由Toyota 設計,所以外觀上 Z4 同 GR Supra 完全唔相同。個人覺得新車外觀設計得好靚仔,好似個凹字型車頂設計,仲好有Toyota 經典跑2000GT 風格,不得不讚賞日本設計師喺細節上所花嘅心思。不過,車身都有失望嘅地方,就係好多入風位都係假而且完全密封,所以係純粹裝飾用途。


凹字型車頂除咗係空氣動力學設計之餘,仲係對經典跑2000GT作致敬。


GR Supra香港行貨入口新車,清一色屬於3.0版,2.0版暫時未有消息。香港賣 GR Supra 3.0車價79萬8,Launch Edition賣81萬8,而Launch Edition特點係有專用19吋合金軨、紅色側鏡仲有紅黑雙色籠,另外揀Phantom Matte Gray車色身就要再加3萬,所以GR Supra 新車價最高可以達84萬8!


上面提到GR Supra 採用嚟自BMW 嘅 B58 引擎,而B58 引擎在 BMW 有咩車款用過呢?有 M2 、有335i,所以對BMW 有認識嘅車迷對呢副機器絕對唔會陌生。 GR Supra 馬力輸出有 340 匹、峰值扭力就有 500 Nm,配合8前速自動波箱0 - 100 公里加速時間係 4.3 秒,而使用同一部機器嘅 Z4 0 - 100 公里加速時間就要 4.5 秒,所以這部車的加速時間快咗 0.2 秒。


用得上B58 自然會想起連 M2 Competition 都用嘅 S58 引擎,如果將來有機會出現喺GR Supra ,呢部車不得了啊!


一跳入車廂,相信有很多車迷都同我感覺一樣,覺得設計同現時 BMW 非常相似,原因係GR Supra 車入面大部分零件都嚟自 BMW,大至中控屏幕、小至兩邊嘅門把都係源自 BMW 設計。有車迷會對呢個舉動有意見,不過對於我嚟講其實 BMW 嘅設計喺一部Toyota 車上面又唔係一件壞事,大家可以諗諗現時Toyota 車嘅內籠設計究竟有沒有一部可以比得上新 Supra 咁靚、豪華呢?第一次坐上車嘅時候會覺得舒服,感覺所有嘢都好乾淨同有誠意,至起碼不會覺得中控屏幕是後期加上去咁奇怪。


車入面嘅設計引起唔少爭議,不過相比起Toyota 自家製嘅車廂設計,BMW 確實係略高一班。


相信有好多車迷會關心GR Supra 嘅過彎表現如何,試車後發現原裝避震唔夠硬淨,高速過彎時會有少少推頭嘅情況出現,但因為避震比較軟嘅關係,相對地舒適度提升,所以如果當佢係日常會用嘅車,原裝避震已經夠用、非常之好,但如果你會進取啲過彎,就需要改裝避震系統。


另一樣令車迷門都注意到嘅係 GR Supra 只有8前速嘅自動波箱可供選擇,手波欠奉。我知道很多Supra 迷得悉這消息之後,對呢架車嘅印象打晒折扣,但用過呢個嚟自寶馬嘅波箱,情況又唔係想像中咁差,不論Upshift 或 Downshift 表現都非常好,唔會有遲緩嘅感覺。


使用正常模式下,新車反應係可以接受,軚盤唔會覺得很輕而且軚感係有,但轉用Sport 模式之後反應就會變到好敏銳,喉聲更大之餘軚感比之前更加重。


去到清水灣比較窄同多彎嘅路段會發現GR Supra 有一個大問題而令部車唔可以係山路上有好好嘅表現。佢嘅2波尾段力量實在太多,但轉用3波後要等得時間太耐當剛剛轉上去時力量又太少,所以會覺得「2波尾好勁,3波頭太弱」嘅情況,所以我個人認為如果係山路上新Supra 嘅表現會不及同廠嘅 Toyota 86好,不過GR Supra 如果以巡航計,我相信86表現就不及新車。


如果山路或高速公路,個人認為GR Supra 比較適合後者使用。


其實以一部直六雙門跑車嚟講,GR Supra 嘅性能表現已經相當唔錯,我明白上一代 Supra 直到今代 Supra 相距差不多有 20 年時間,各位 Supra 迷對佢嘅高期望都合理,但如果你期待GR Supra 係一部很有爆炸性、很有高科技性能表現嘅日本神級跑車,可能新車就未必可以畀你。「Supra」 這個名字對一部新世代嘅直六雙門跑車來講實在係太沉重…


新車車頭都好長,啱啱上車要少少時候適應。


車身上最大疑惑就係眾多嘅入風位竟然密封。


GR Supra 規格

引擎:2, 998c.c. 直6 渦輪增壓引擎

馬力:340hp/5,000 - 6,500 rpm

扭力:500Nm/ 1,600 - 4,500 rpm

傳動:8前速自動波

驅動:前置引擎、尾驅

車身(長x闊x高):4,380 x 1,865 x 1,295mm

軸距:2,470mm

車重:1,520kg

售價:$798,000起

查詢:Crown Motors(2884 7999)


Text: Daniel

 覺得這文章有用?按下面的按鈕分享給你的朋友 

你可能感興趣的文章