平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

Toyota頂級車款 第三代 Century

香港限定拍攝

如果要數當今最豪華、最舒適嘅車款,歐洲車系有Rolls Royce Phantom、Bentley Mulsanne 而日本代表就有豐田(Toyota)嘅Century。Century 大名相信有唔少車迷細細個就已經聽過,因為第一代嘅Century 早喺1967年已經推出,當年正正係紀念豐田創辦人豐田佐吉誕辰100週年而生。時至今日,連日本天皇、 豐田社長同埋日本各大型公司高層出入依然都會坐嘅Century 已經嚟到第三代,不過同一般日本好嘢一樣,Century 甚少會出口到外地,香港行貨? 不了!今次《Opencar》有機會拍攝呢部數目只有極少嘅天皇坐駕,二話不說即刻去馬。


第三代Century 車尾部份同上一代分別唔大,依然可以保留優雅、高級嘅氣質。


編號G60 嘅第三代Century 距離上一代面世已經有22 年時間,不論外型或用料新一代都廷續之前一樣咁高級、豪華但感覺又唔會浮誇。如果要數到最大分別嘅地方相信係車頭嘅機器,由以前嘅5 公升V12 引擎,轉用5公升 V8 混能引擎,馬力輸出由280匹提升到431匹(油電綜合輸出)。由傳統引擎轉用混能引擎好處除咗比以前慳油之餘,因為低速行車時只會用純電驅動,所以車籠入面非常之寧靜。其實即使V8 引擎發動後,因為有極佳嘅隔音表現,可以傳入車廂嘅聲音已經相當少。


打開頭冚之後其實冇咩可以見到,最搶眼莫過於右上角兩條螢光色、好粗嘅電線喉,正正就係話你知佢係一副混能引擎。


50 年以嚟Century 服務著一班喺社會地位有返咁上下嘅人士,要令佢哋上落車有VIP感覺對於設計師係非常重要嘅一環,所以製造新一代時就特別加長軸距 - 今代比起上一代加長咗65mm 令本身空間已經非常充裕嘅後座有更大提升。另外,門踏同車底高度都同樣減少15mm,有咩用?當鋪上地氈之後唔需要做跨過門檻嘅動作令上落車更加方面。


試坐過呢部有「Toyota頂級車款」稱號嘅Century之後就會發現呢個「朵」絕對唔係浪得虛名,同時又不得不佩服Century 喺做工上嘅仔細程度,小如後座旁邊嘅窗簾同頭頂上嘅閱讀燈都經過精心計算,以開閂窗簾咁簡單嘅動作為例,順暢度之高分分鐘勁過家用窗簾,又或者頭頂燈光光暗度可以自己調較,足夠令你不禁會問「使唔使咁細心呀?」。


前、後座嘅用料都採用絲絨,坐上去不論前後座都非常舒服,證明比起真皮櫈,如果用料夠高級的話其實絲絨可以更加舒服。不過Century 用料亦唔係清一色用絲絨,門板同中控台都有用到真皮同木料,而且真皮用料明顯經過挑選,摸上手夠軟熟,總之上到車包你坐到舒舒服服。


車入面嘅設計同車外一樣,屬於穩陣派,唔會有花巧感覺,同時喺中控、波棍甚至軚盤嘅設計上都唔難發現Lexus 嘅影子。


不論前或後座都用咗絲絨物料,而唔係同現時大部份嘅車一樣用皮物料。


調較好前座嘅駕駛座姿之後,後座空間非常充裕膝頭同前座有4個半拳頭嘅空間。


車入面嘅白色椅套細心睇全部都印有日本傳統皇冠圖案。


前座中間嘅mon. 可以控制車入面冷氣同音響等等嘅設備。


根據廠方資料車入面總共有20個喇叭,保證靚聲。


後座頭頂嘅燈光可以自己調較。


暗又得、光少少又可以。


車頭同車尾都有鳳凰徽章,而車頭嘅徽章更加係工匠用六星期時間人手雕刻而成。


車頭鬼面罩入面用咗「無限」個日本傳統皇冠圖案。


車尾鳳凰徽章下有泊車鏡頭,可惜清晰度就不敢恭維。Century 咁大部如果冇後波鏡頭,泊車都一定會有難度,所以有好過冇啦!


最後,日皇德仁嘅「即位之禮」將會於今個月22號舉行,當日呢位新任日皇就會坐住部獨一無二、車價要8000萬日元(大約580萬港幣)嘅豐田「無頂」第三代 Century喺東京巡遊。呢次巡遊路線由皇宮開始,終點為赤坂御所,活動大概為時30分鐘,如果當日喺日本嘅車迷千萬唔好錯過喇!



Toyota Century規格

引擎:4,968 c.c. V8 混能引擎

馬力:431PS (油電綜合馬力)

扭力:510 Nm/4,000 rpm (V8引擎)300 Nm (電摩打)

驅動:前置引擎、後驅

車身(長x闊x高):5,335 × 1,930 × 1,505 mm

軸距:3,090 mm

車重:2,370 kg

售價:$3,180,000

查詢:東榮汽車 Jason Cheng(5311 7471)


Text、Photo: Daniel

 覺得這文章有用?按下面的按鈕分享給你的朋友 

你可能感興趣的文章