平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

勁慳油!Serena e-POWER

7人車行$0.7/1公里

如果經常要車一家大細外出嘅車迷,買入一部7人車日常用似乎係一個非常明智嘅選擇,喺眾多選擇入面Nissan 嘅Serena 一直以嚟都擁有一班捧場客,貪佢舒服得嚟又穩陣,但係身為7人車體積一定有返咁上下,曾經有車主向我提及舊Serena 耗油量大概每公里要$1.5~ $1.7 之間,平心而論又唔算得上十分大食但無可否認對比新嘅Serena e-POWER 舊版就輸蝕咗一大截。



全新嘅Serena e-POWER 車入面獨特嘅設計有效令耗油量大減到每公里$0.7!佢有咩法寶去慳油?就係佢套e-POWER 系統。呢部車採用嘅e-POWER 系統主要由4個部件組成,包括有:驅動摩打、發電機、鋰電池同埋引擎。簡單講Serena e-POWER 係一部有引擎,不過同時又係100%依靠電力推動嘅「電車」,字面上睇落好似矛盾而事實上車入面嘅1,198c.c. 直三引擎喺整套系統入面嘅角色只會幫發電機作充電用途,落轆嘅動力只會由鋰電池或發電機提供。



4個部件喺不同情況下擔任嘅角色會有少少唔同:一般行車而且鋰電池電量又充足情況之下,鋰電池可以單獨供電畀驅動摩打再將動力傳去頭轆,呢個情況下引擎唔會啟動,部車可以純以鋰電推動。試車當日試過以呢個模式行車大約可以由呈祥道明愛醫院附近到葵涌道,引擎先需要介入幫鋰電池充電。另一個情況係一般行車但鋰電池電量又唔夠,引擎就會啟動,連接住嘅發電機就會幫鋰電池充電,再輸出電力推動驅動摩打。如果遇到上斜又或者要突然加速嘅情況,引擎就會幫發電機供電,同一時間發電機會直接推動驅動摩打,而唔係幫鋰電池充電。


有用電梗係要有充電啦,每次鬆開油門就會發現佢比起普通車減速快好多。原來佢同會利用減速呢個動作嚟幫鋰電池充電。但呢個動作可能會引發出一個安全問題,忽然減速後面嘅車又知唔知呢? 原來佢會自動幫你著尾燈,情況同你踩迫力一樣,不過Serena e-POWER 一個油門就可以做晒。



上面都提及過Serena e-POWER 有副引擎喺到,如果以為可以畀電車牌費嘅朋友唔好意思嘞 Serena e-POWER 係需要畀每年 $3,929嘅牌費(1,500c.c.以下牌費)。咁部車仲有咩優勢呢?e-POWER 系統最大嘅好處可以免去充電嘅麻煩,揸開電車嘅車迷搵位充電其實都幾頭痕,而且純電行車時又可以比電油車更加寧靜坐喺入面份外舒適。對於駕駛者而言新車另一個好處就係即使部車重量有1,790 公斤,佢嘅起圍加速畀我嘅感覺未至於去到有爆炸性嘅表現但相比一般傳統2000c.c. 嘅7人車明顯爽快好多。



車入面同上一代最大改動一定係由8 座變7 座,但同時一共有12個座位佈局可以揀,令新車可以應付日常生活遇到嘅唔同情況。另外,車入面嘅設備都同一般日本車一樣非常細心,儲物空間多到誇張,仲有現今世代人都非常需要嘅USB充電位,成車總共有6個,近乎係每一個座位自己都會有一個。其他嘅裝備仲有同級對手都欠奉嘅側門腳踢感應自動開啟功能、唔洗次次都要預空間先開到嘅雙尾門設計等等。雖然新車四四方方,都佢嘅車長都有4.7米、闊1.7米,對於新手嚟講泊車可能有少少難度,呢個時候360度泊車車cam就大派用場嘞!









Serena e-POWER Highway Star VIP spec.


引擎:1,198c.c. 直三

電動馬達:EM57

馬力:136ps

扭力:320Nm

驅動:前驅

傳動:單速自動

車身:4,770 X 1,740 X 1,865(mm)

軸距:2,860mm

車重:1,790kg

車價:$359,800

查詢:合誠汽車(2803 5333)


Text: Daniel

Photo: Billy

 覺得這文章有用?按下面的按鈕分享給你的朋友 

你可能感興趣的文章