平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

限量400部極上拖頭 M-Benz Actros 1845 Edition 1

集高科技大成 M-Benz Actros 1845 Edition 1


「見到大大部嘅拖頭可能好難聯想到新科技」,呢個只係你嘅想法啫!其實新世代拖頭嘅發展絕不下於你日日都坐嘅私家車!唔信?你睇睇平治最新第5代Actros就知。同平治私家車一樣設有頂級Edition 1版本、車身用上極之有型嘅包圍,更誇張係車廂豪華程度及高科技感,根本就係S-Class級數!仲未算,新Actros首創「MirrorCam」電子式倒後鏡,完全顛覆拖頭以往畀人嘅感覺。揸上去又係咩感覺呢?咁就要睇睇我哋《OPENCAR》嘅獨家試車報告喇!


已發到第5代嘅Actros,其實唔只得拖頭系列咁簡單,更有不同車陣可配,既可以係拖頭,亦可以係噸車,而今次代理引入全球限量400部嘅Actros 1845 Edition 1,就係以18噸拖頭登場。不少人都對M-Benz嘅商用車命名有點疑惑,好似今次Actros 1845內的「1845」代表乜嘢?「18」即代表車軸承重,「45」代表有450匹(449匹)馬力,好容易記住。


「Edition 1」呢個特別版稱呼,相信好多人都喺M-Benz其他AMG車系上聽過,主要係以套裝件改動外觀,並且以限時或限量推出。「Edition 1」係首次出現喺Actros身上,主要改動包括有黑色配電鍍鬼面罩、車身包圍、黑色軨、射燈太陽擋、金屬門邊腳踏、真皮車廂裝飾,同埋專用物料座椅等等。「Edition 1」冇一個生產期限,但香港市場遠遠唔及外國大,所以暫時只有眼前呢一部!仲可唔可以增加配額?有興趣真係要同代理傾傾嘞。

而普通版本嘅第5代Actros其實都有一個大賣點,大家睇睇測試車嘅門邊就知。兩側已經冇咗實體倒後鏡,改為一個名叫「MirrorCam」嘅鏡頭,駕駛者唔需要透過玻璃窗望鏡,只需望車內兩邊A柱位置,就見到有兩塊巨型彩Mon.,每塊分成上下兩截,顯示正常視角及廣角景物,而且彩Mon.內更可以設定虛線,用作標示拖架或貨櫃最末端位置,方便駕駛者倒車或轉彎時睇清楚車尾距離。此外,MirrorCam仲有一個特別之處,就係當拖住貨架轉彎時,車外嘅鏡頭可以微向外,作用係避免貨櫃阻擋轉彎時嘅車側視線,確保車身兩旁嘅安全。


第5代Actros嘅廢氣排放已合乎歐盟6期標準,測試車用咗12.8公升直六柴油Turbo引擎,輸出馬力449hp/1,600rpm,最大扭力2,200Nm/1,100rpm,廢排低之餘,輸出仲夠晒大。波箱方面,Actros嘅波箱係12前速電子離合器款式,操作都相當簡易,波棍設於軚盤右後方,一支控桿已可以控制波段、切換行車模式、操控+/-模式及調節廢氣煞車,咁樣嘅設計有助簡化中控台設計,配合多功能touch mon.及軚盤上嘅輕觸掣,令車廂更簡潔。

一如M-Benz嘅私家車,Actros嘅行車模式可分為經濟、正常及運動,3個模式。以經濟模式行車時,波箱會以比較高波段起步,而且會由電腦計算負載,波箱會以低轉數轉波及會跳波段升檔,減低耗油。運動模式就會用較高轉數轉波,並且會逐個波段升檔,以搾取每個波段嘅最大輸出。


M-Benz Actros 1845 Edition 1 Spec.

引擎;12.8L直六柴油Turbo

馬力:449hp/1,600rpm

扭力:2,200Nm/1,100rpm

傳動:12前速自動,附+/-模式

車身:6,458 x 2,500 x 4,023(mm)

軸距:4,000mm

車重;18,000kg

拖重;44,000kg

油缸:720L

尿素缸:60L

車價:$1,388,000

查詢:仁孚行(2504 6181


Text:Chris

 覺得這文章有用?按下面的按鈕分享給你的朋友 

你可能感興趣的文章