平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

Audi RS Q3 Sportback 試駕

突破框框

SUV 車款對於車廠嚟講絕對係一隻「會生金蛋嘅鵝」,只要一出SUV就可以令整體銷售量爆升,而出SUV 車Audi 可以算係表表者,由Q2 到Q8、由細細部到大大部都有,但SUV 天生缺乏一種令人一坐上去就會熱血沸騰嘅感覺,而RS 車系嘅新成員 RS Q3 Sportback 可唔可以打破呢個定律呢?



用得RS 呢個「朵」就一定要係辣嘢先襯得起啦!所以RS Q3 Sportback 同新一代TTRS共用同一副嘅EA855 引擎,即係2.5 公升直5 Turbo 引擎,喺 5,850–7,000 rpm 之間最大馬力有400匹、480Nm 峰值扭力早喺1,950 - 5,850 rpm 就已經出晒嚟;配合7前速S tronic 自動波箱同quattro 恆久式四輪驅動系統之下0-100km/h 加速時間只係4.5 秒,極速就限制係250km/h。



RS Q3 Sportback 外觀方面擁有專屬包圍、單體式車頭鬼面罩、傾斜式車頂Coupe 設計、雙出橢圓形大尾喉、21吋鋼琴黑鈦合金軨、Y字型日行燈。除此之外,新車仲配備咗 RS Sports 懸掛系統令車身高度比起標準版Q3 Sportback 矮咗10mm,令部車望落更加有跑車感。可能大家都係SUV coupe,個人認為車尾部份望過去同「大大哥」Lamborghini 嘅Urus 有幾分相似。


車籠入面裝備有形狀比較正方嘅RS軚盤、更新咗形狀嘅波棍頭、10.1”觸控式中控屏幕、12.2"電子錶板、B&O音響、天窗、全車四個Type C 充電位、360後波泊車cam、電動尾門等等。上面都有提到RS Q3 Sportback 有傾斜式車頂設計形造 SUV coupe嘅外觀,但「一針冇兩頭利」,呢個設計令後座頭頂空間打咗唔少折扣,以5呎8吋高度計大概只有兩指空位。相對地,前座同膝頭嘅空間就充裕好多嘞,調校好駕駛座姿之後前座仲有兩個半拳頭空位。可以選擇嘅行車模式有:舒適(Comfort)、自動(Automatic)、動感(Dynamic)、效能(Efficiency)、個人化(Individual)以及可以自己設定嘅RS模式,一共六個行車模式可以選擇。揸得RS 車款又點可以唔講RS Mode?利用喺軚盤上面嘅「RS MODE」按鈕就可以快速由其他模式轉換成RS Mode,進入呢個模式除咗電子錶板顯示比平時更多嘅行車資訊之外,用家仲可以自由設定部車3個地方:Drive Steering, Engine Sound, Quattro 令部車更加個人化。



行車表現方面,新車畀我嘅第一印象比標準版Q3 嘅避震硬淨好多,甚至比絕大多數Audi Q系車款都要嚟得硬淨,運動型避震加上高岡性車身令即使有SUV 型車身高度嘅RS Q3 Sportback 亦可以用較為進取嘅車速入彎,提昇唔少信心。呢副比上一代輕咗26KG 嘅EA855 5汽缸引擎再加上 Audi 拿手嘅quattro 四輪系統,行車表現穩定,唔經唔覺好容易就踩到「爆晒錶」,但佢有唔算輕嘅1,775KG 車重再加埋一套21”嘅大軨令加速方面唔覺有好爆炸性表現,貼背感唔大。雖然加速力未必係強項,但一樣絕對值得一讚嘅地方係佢套RS 大迫力。SUV 車款「通病」係唔夠收,配上一副400 匹機器如果唔夠收其實都幾危險,但新車就唔覺得唔夠收呢個問題。個人認為要令RS Q3 Sportback 成為一部令人會有更熱血感覺嘅型格SUV 有兩個地方可以改善:即使經過調校過後軚感都係過輕令駕駛者感受唔到太多路面嘅資訊;另外作為站喺Q3 車款最頂尖嘅型號RS Q3 Sportback 略嫌喉聲唔夠澎湃。


總括而言,雖然RS Q3 Sportback 未必可以好似一般跑車咁,畀到人一種要即刻跳上車嘅感覺,但佢煞食嘅外型同時又擁有SUV 嘅實用性,內在又有副強勁嘅直5 引擎,一部頂級嘅SUV 嚟講RS Q3 Sportback 要有嘅佢都已經有齊,係車價未必人人負擔得起姐!

















RS Q3 Sportback 規格

引擎:2,480 c.c. 直五渦輪增壓引擎

馬力:400hp/5,850 - 7,000 rpm

扭力:480Nm/ 1,950 - 5,850 rpm

傳動:7前速 S tronic 自動波

驅動:前置引擎、quattro 四驅

車身(長x闊x高):4,507 x 1,851 x 1,557 mm

軸距:2,680 mm

車重:1,775kg

售價:$845,000 起

查詢:Audi Hong Kong(3465 0000)


Text: Daniel

Photo: Day

 覺得這文章有用?按下面的按鈕分享給你的朋友 

你可能感興趣的文章