平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

非一般Facelift—Mitsubishi L200

一次全面性升級行動 Mitsubishi L200


眼前嘅L200唔係全新車型,不過車廠對佢嘅外貌進行咗大刀闊斧嘅改動,改動大到第一眼望佢,以為佢係全新一代車型。L200一直都有喺香港市場發售,不過2005年前嘅L200一直都用方形車身設計,內外完全冇私家車味道,咁多年嚟都係地盤用車,職安建真漢子呀!2008年先喺香港推出嘅第4代L200,其實已經非常私家車化,加上當年香港興起將Pickup當成SUV咁用,L200的確有一段時間被受注意。睇返第4代L200喺2008年推出時賣$279,000,直至2017年第5代入替時,車價都只係貴咗唔夠$10,000,賣$288,800,喺今時今日嘅環境,你估第5代L200 Facelift版會以幾多錢開賣?係$278,800呀!莫講話平過2017年,比起2008年、十二年前仲要平多$200!用嚟入油又好、食返餐又好,總之就平咗啦!


L200能夠十二年唔加價兼平咗,除咗因為大市氣氛唔好、生意難撈外,Facelift一般都代表車款步入尾期,車價平啲自然更易吸引人。既然係Facelift,當然要同之前有一定分別先得,不過間間車廠做法唔同,好似早前試嘅Nissan Qashqai就著重內在改動多於外觀,換新引擎、新波箱,外貌就分別不大,真係唔試過車都唔知好嘢。L200採取相對大規模嘅Facelift行動,先從外表講起,如果唔係一早知佢係Facelift版,一定會以為佢係全新一代(事實上真係有人咁樣誤會),整個車頭唔同晒,由以往帶有少少圓渾變成好似同廠Eclipse Cross咁,充滿粗獷味嘅起角設計,營造出更高頭大馬感覺,我個人就非常喜歡喇,Pickup係要粗獷啲先似樣。


外貌大裝修只係L200嘅一碟豐富頭盤,跟住仲有波箱同引擎作為主菜,還記得2008年第4代仲用緊4速自動波,去到2017年第5代前期型已升級至5速自動波,嚟到第5代Facelift更用上6速自動波,仲可以喺軚盤後嘅+/-撥片操作,十足高級SUV!而且表板換咗細mon.,四驅系統轉換時就會有動畫出現,有返啲新鮮感。除此之外,L200嘅電子安全系統都算落足料,有防打滑系統呢啲基本嘢外,仲有埋高級SUV先有嘅追撞警告系統、越線警告系統同斜坡車速控制系統等等。乘坐感方面,如果部車靜止時坐入車廂,真係同部SUV冇乜分別,真皮座椅承托力足夠,後座腿部空間亦合理,唯獨後座背就係分隔貨斗同車廂嘅梗窗,變相冇尾箱用。


雖然車廂乘坐性、豪華設備都十足十SUV咁,但一開車就露出貨車真本性,後輪用咗為負重而設嘅葉片彈簧,加上測試車貨斗冇載貨物,行車時車尾出現明顯跳動,而且對凹凸路面嘅處理唔夠細緻,如果濕滑路面要加倍小心。為符合EURO VI廢氣排放標準而生嘅引擎,比Facelift前容積細咗、馬力亦少咗31匹,現時輸出150匹馬力及40.8kgm扭力,不過耗油就低至6.3L/100km,如果用嚟當私家車用,油費真係拍得住啲電油Hybrid車。


Mitsubishi L200 Spec.

引擎:2,268c.c.直四柴油Turbo

馬力:150ps/3,500rpm

扭力:40.8kgm/2,000rpm

傳動:6前速自動、附+/-模式

制動:前透氣碟、後鼓式

車身:5,305 X 1,815 X 1,780mm

車重:3,110kg

耗油:6.3L/100km

車價:$278,800

查詢:環宇汽車(2721 1111)


Text:Chris

Video:Day

 覺得這文章有用?按下面的按鈕分享給你的朋友 

你可能感興趣的文章