平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

難以下決定 Porsche Cayenne S Coupe 4-seater

選擇困難症 Porsche Cayenne S Coupe 4-seater


回顧Porsche多年歷史,實在太多經典作品,911車系當然係經典中嘅經典,喺Porsche佔有不可動搖地位。不過,如數到近十幾年最具影響力嘅車款,Cayenne一定名列前茅。除因為Cayenne係Porsche首款SUV外,更係首次四門,喺2003年推出初代款式時,可以話係平地一聲雷!大佬呀,Porsche推出四門車呀!仲要係當年最潮嘅SUV呀!加上當年車價定位比911更平,根本註定大紅!短短三年已成為車廠主要收入來源,一款車令全車廠風生水起。

17年過去,Cayenne喺2018年都已經發展出第三代,係咪仍然有市場優勢?廣大車迷對佢仍然有新鮮感?當然有一定擁躉啦,不過都係時候搞搞新意思,所以廠方喺年初首次推出Coupe車身版本,注入新鮮感之餘,我個人覺得Coupe版比往版本更切合Porsche嘅形象。



點解會話Cayenne Coupe更切合Porsche?先睇睇Porsche嘅形象,好明顯係賽車界嘅精英份子啦!咁多年嚟每一款車都有一定sporty元素在內,就算SUV Cayenne,又或房車Panamera,只要一揸上手、出街走兩轉,就知佢非一般四/五門車。既然有sporty底子,Cayenne嘅傳統SUV車尾對比之下就略為保守喇,所以Coupe版嘅改動完全集中喺車尾部分,不過要改一個車尾並唔係斬走個尾咁簡單,其實A柱比普通Cayenne更加低矮,車頂由B柱打後開始向車尾下傾,一來令車頂至車尾線條更順眼,二來亦可以令成部車嘅重心降低。除咗車尾形態改變,Coupe版連尾門都唔同咗,剔除尾窗水撥及加設升降尾。測試嘅Cayenne Coupe係S版本,而且全車加上價值超過50萬嘅option設備,當中最爆當然係一幅過碳纖車頂,可以進一步令車身重心調低,但有得必有失嘅,用上碳纖頂就冇咗巨大嘅玻璃天幕頂。



當一個準買家要喺Cayenne與Cayenne Coupe之間作出選擇,而最後揀咗Cayenne Coupe時,明顯跑車化嘅外表係落訂嘅最大推動力,由此可見Coupe版其實會對普通車身的Cayenne構成影響,但又如何?Porsche就是希望用家就算選擇都在兩部Porsche之間選擇,大包圍策略是也,肥水不流別人田。

用上Coupe車身之後,實用性當然比普通版低,但實際坐入車廂又唔覺有好大差別,只係頭頂空間少咗啲啲,而且今次Coupe版可供買家選擇4座或5座位版,換言之後座載2人或3人,如果載2人嘅話,保證唔會覺迫狹,冇天幕車頂增加空間感都冇所謂啦。代理提供嘅測試車,可以話係一個非常好嘅示範車,全因佢裝配嘅設備取向明顯跑車化,比以往測試車裝上大量豪華設備好唔同,除上述嘅碳纖車頂外,筆者喺測試車上發現有兩點非常討好我個人口味,首先軚環同車廂天花採用Alcantara物料,觀感同手感都非常之好,其次、亦係最吸引一定係用咗復古味嘅黑、白布料混合真皮座椅,充滿60年代賽車味道,而更重要係呢個option唔需要加錢選購!如果你覺得全真皮座椅睇到厭,呢款座椅設計你一定buy。





性能方面,Coupe版同普通版嘅配搭一樣,Cayenne S Coupe配用2,894c.c. V6 Twin Turbo引擎,輕易輸出440匹馬力同550Nm扭力,廠方公佈嘅0-100km/h加速時間係4.9秒,以SUV嚟講絕對係中上嘅表現,再上一級已經係林寶Urus或Benz GLE 63 AMG呢啲級數。雖然我冇將Cayenne S Coupe同Cayenne S同場比較,但幾乎可以肯定Cayenne S Coupe憑藉較低重心而得到更出色彎路表現。實際上,眼前呢部Cayenne S Coupe測試車更加入後輪轉向系統,完全顛覆咗SUV車體笨重唔靈活嘅概念,低速細彎時,後輪會輕微以相反轉向,模擬出短軸距效果,從而令轉向表現更靈活敏捷。當以高速巡航時,後輪會改以輕微與前輪相同方向,模擬出長軸距效果,令切線較穩定。類似嘅後輪轉向系統早出現喺911同Panamera身上,已經印證咗優點多多,今次Cayenne S Coupe擁有更龐大車身,效果更明顯,而呢套咁有用嘅系統,稅前價值只係$19,600,個人認為係必選裝備。




如果我有$2,100,000左右嘅買車預算、又強行要我買SUV的話,眼前呢部淨車價$1,577,000、加咗$524,600 options嘅Cayenne S Coupe應該係最好選擇,因為市場上暫時未有一款同級車擁有咁好嘅操控。以我試車短短3小時,就發覺佢重心控制得好低,相信係Coupe車身同碳纖車頂導致,配合埋後輪轉向、四驅系統,令佢擁有SUV罕見嘅「斬瓜切菜式」爽快攻彎表現,印象中未有一款大型SUV可以咁,實力同Panamera S旗鼓相當。若然要我喺Cayenne S Coupe身上搵出不滿之處,我只可以講用咗8速Tiptronic S波箱表現係就係暢順緊密,但就係少咗一份PDK波箱嘅勇猛同火氣。如果波箱都可以有options揀,我會寧願犧牲Tiptronic S嘅順滑性,改用PDK,反正都用上咁多跑車化配備,唔差在用埋PDK啦,會更加切合身份。



Porsche Cayenne S Coupe 4-seater Spec.

引擎:2,894c.c. V6 Twin Turbo

馬力:440hp/5,700-6,600rpm

扭力:550Nm/1,800-5,500rpm

傳動:8前速自動,附+/-模式

車身:4,931 X 1,983 X 1,676mm

軸距:2,895mm

0-100km/h:4.9秒

極速:265km/h

車價:$1,577,000起

查詢:2926 2911 (Porsche Centre HK)


Text:Chris

 覺得這文章有用?按下面的按鈕分享給你的朋友 

你可能感興趣的文章