兩食辣泡菜 Hyundai i30 Fastback N

chris
25 Jan 2021
( 13 Comments)
2084

Hyundai i30 N辣出兩種風味

我大概廿幾年前開始接觸韓國車，當年香港市場嘅韓國車品牌都唔少，除Hyundai同Kia外，仲有Daewoo同埋SsangYong。當年嘅韓國車畀我嘅印象只有一個，就係平價！一部小房車，日本品牌賣12-13萬，韓國車就賣10萬有找，而且更有可能比同級日本車大部，未知佢抵唔抵食之前，都知佢夠晒大件。廿幾年前嘅韓國車就係以此生存，今日嘅韓國車又如何？只要稍有留意車壇消息都知，韓國車仍然比歐、日對手平，但今時今日我會話佢「抵買」，唔係平咁簡單。以平價爭取市場佔有率呢一招，韓國車一直玩緊，但一味平都唔係辦法，所以韓國車由廿幾年前買Mitsubishi同Benz引擎，再到十幾年前由歐洲設計師主理車身設計，喺廿幾年間極速發展，比70年代嘅日本車發展得更厲害。

身為韓國車龍頭企業嘅Hyundai，最新企劃已經唔再單純賣數量、賺大錢，係要喺高性能車佔一席位，正正係中國人所講嘅「發財立品」。高性能車一定唔係最賺錢，但佢係最好嘅Marketing技倆，只要有一款車贏出國際賽，之後再量產推出市場，就係最好嘅Brand Building工作。所以Hyundai就設立「N」系列，頭炮就係i30 N。

i30 N Hatchback版本可以話係「N」系列嘅招牌作，喺賽場同銷量上都有好好表現。

實用要Fastback、瀟灑揀Hatchback

Hyundai為令「N」系列一炮而紅，當然投資不菲，又搵BMW工程師，又不惜工本參加不同國際賽事，但歸根究底都要產品真係有料到先得。i30N喺去年到香港，更迅即被各大汽車傳媒大力推介，一時話係「GTI殺手」、一時又話「性價比超高」，去年筆者只是簡單試過一小段路，未算有好深印象，最近代理已推出旅行車版嘅i30 Fastback N，我們有幸進行評測之餘，相隔個多星期後代理更借出揭背版i30 N供我們長測，今次終於可以試真一啲，亦可以體驗一下兩個版本冇乜分別，所以今次試車報告由兩部唔同場嘅車組成。

Fastback版車身比Hatchback版長咗120mm，但軸距維持喺2,650mm水平。

Fastback版嘅尾箱地台長咗少少，而且仍然有一條粗壯嘅Room bar，用作加固車架剛性。

從車廠發佈嘅資料，兩部車嘅分別就只有外觀，而且集中車尾部分，如你將先推出嘅揭背版視為玄門正宗，咁Fastback版嘅車尾就好似僭建物一樣睇唔順眼。而事實上Fastback版嘅外觀比例係有啲怪，佢唔似Audi A5 Sportback或M-Benz Shooting Brake車系咁易入口，實在要少少時間先可以令人覺得順眼。但實用性方面，Fastback係會比揭背版好，筆者就有一位朋友因為要顧及小朋友需要而揀選Fastback版，相信係為咗吞吐大量小朋友嘅出行用品同手推車吧。由於Fastback車尾用咗傾斜設計，所以後座頭部空間同揭背版幾乎冇分別，買Fastback定Hatchback，真係視乎你想要咩樣，我個人就會揀Hatchback揭背版喇，成個外形緊湊啲，冇咁累贅。

棍波加「REV Matching」夠過癮

駕駛感、引擎輸出，以至波箱表現，兩個版本可以話99%相似，剩餘1%大概要駕駛至比較極端先有分別，例如極速風阻、高速車身滾動等等，恕我無能為力試唔到呢啲喇。不過同揭背版i30 N多日嚟相處，總有幾點深刻印象，首先係引擎電腦過份聰明，應做嘅做到，唔想佢做都做埋！講緊係佢個「REV Matching」自動補油功能，可以自動喺拖波時補油，令轉數齒合更順，右腳唔需要趁住左腳踩極力子一剎去向油門補油，可以專注踩迫力，完美代替棍波高手引以自豪嘅「踭趾動作」，真係人人都可以成為棍波高手，而且由電腦負責去計算補油量，一定比右腳踩油更準繩。「REV Matching」可以手動開關，甚至因應駕駛模式已調節反應，完全唔會影響「真正」棍波高手一展身手嘅雅興，但i30 N有個「起步輔助功能」我就唔知點樣整熄佢。呢個功能主要係1波起步時，電腦會喺極力子接近磨擦點時畀少少油，就算你唔踩油門、只係慢慢鬆開極力子都夠力起步，好似啲柴油商用車咁。但問題係，當電腦感覺到你右腳稍向油門施壓，呢個輔助功能就會突然消失，如果稍一分神畀少啲油，就會當場死火，要一定時間去適應，尤其當塞車慢行時，記緊右腳唔好踩油門。

不論係乜嘢版本嘅i30 N，車廂陳設都係一個樣，最重要係暫時只得六速棍波。

「REV Matching」系統都可以按用家需求調節補油反應，就算係棍波新手都唔使怕，一定完美補油唔會「跑馬仔」。

老實講，i30 N有成275匹馬力同35.9kgm扭力輸出，未試車都知佢可以有凌厲嘅行車表現，實際試車多日其實大多數時間都將行車模式設定至最激進，即係引擎輸出、REV Matching、排氣喉聲、懸掛及轉向反應等等，都用「SPORT+」，純粹出於享受佢全時間嘅爆炸式喉聲，同埋有少少扽但又好貼伏嘅行車表現，佢嘅入彎表現其實未去到Type R嗰啲咁斬釘截鐵，反而有啲柔韌，明明接近突破輪胎極限，但仍然好似想你再快啲入彎咁。雖然用最激進模式係可以滿足到我，甚至絕大部分「快車」迷，但部車又唔係得一個位，總會接載一下乘客吧，所以我亦試過邀請親朋戚友作白老鼠試坐，普遍都接受唔到我喜愛嘅Hardcore模式，要將所有設定都調校至Normal或更斯文，乘客先會收起咒罵聲。由此可見，i30 N其實有較斯文、較易為人接受一面，買家可以當駕駛模式係一個變身掣，一撳就變身車手，再撳又變回乖仔、好老竇。定位上，i30 N會比其他品牌嘅同級車平易近人一啲，就算車內設備更高級、更完備，車價都係平過人，36萬有找嘅車價，可以買到啲咩？大概買到部VW Golf GTI Performance，但Golf GTI Performance只得245匹，比i30 N足足少咗30大匹，而且設備上唔及i30 N。

前座唔係咩Recaro名牌嘢，但承托力確實唔錯，而且仲有電動調校。

對比前座，後座承托就一般，不過用上仿猄皮就可以提升磨擦力，pat pat冇咁易左跣右跣。

跑車性能、腳車油耗

我從代理借嚟i30 N用咗3日，總共行咗208.6km，話長唔長，話短唔短，我諗半缸油都未用到，好彩試車路段都叫做多元化，有過百km/h嘅高速巡航，亦有山路激走，得出平均耗油係12.2L/100km，如以現時冇折扣油價$17.94/L計算，i30 N嘅實測油耗約$2.19/km，以275匹馬力、2.0公升Turbo跑車嚟計，實在合理，如果用有折扣油，再加上斯文啲揸，$1.5/km不是夢。

我唔想再講咩「放低品牌成見」，因為Hyundai已經係一間非常具規模車廠，近20年嘅進步可以用神速嚟形容，喺唔同嘅汽車範疇都有好好成績，試問有幾多間車廠可以喺日用車、賽車、混能車，以及電動車領域上都有好表現？再者，喺歐美市場早已將Hyundai視佢如Toyota或Nissan等日本大品牌咁看待，而且同級車價往往便宜一啲，香港市場、又或可以話亞洲市場，全都崇尚德國車，反而歐美用家就真係睇品質揀車，香港人真係唔好盲目跟風，要睇清楚、諗清楚。