「究竟你係MPV定Van？」 —Peugeot Rifter

chris
19 Feb 2021
( 13 Comments)
2565

小Van大變身 Peugeot Rifter

有人話，香港汽車市場基本上只得兩類車賣得，一係SUV，另一就係MPV。SUV受歡迎程度可以話比MPV更甚，SUV係「全地球」咁受歡迎，不論性別、年齡、國藉及膚色嘅人都鍾意，反之MPV就唔係。MPV喺香港受到「地區性」歡迎，喺香港呢個彈丸之地就威，喺到歐洲，車廠甚至唔願意為推出純MPV車款，大多以「一雞兩味」，甚至「一雞幾味」登場，share同廠嘅輕型貨車底盤就係最常見、最便捷嘅方法。

Peugeot呢個紅極一時嘅法國品牌，廿年前個個都識206 GTI，但近年Peugeot喺香港市場只的Expert貨Van叫好叫座，有冇SUV同MPV撐場？都有嘅，早前有部3008 SUV，成績有目共睹吧。Peugeot有冇MPV可以喺香港賣？當然有，就係今次測試呢部Rifter。

去除Van味

「Rifter」呢個名好陌生？又難怪，從來未聽過呢，如果我話Partner呢？即時有啲印象啦！無錯，其實Rifter係Partner嘅入替車款。1996年同屬PSA集團嘅Citroen同Peugeot，就分別共用底盤同引擎，各自推出初代Citroen Berlingo同Peugeot Partner，而去到2008年，再次雙雙進化成第二代。去到2018年，第三代Berlingo上市，但Peugeot就冇再用Partner呢個名喇，改為Rifter，就係眼前呢部。咁Rifter又係一部點樣嘅車呢？既然同以前嘅Partner有血源關係，就已經表明佢係一部貨Van底子嘅MPV，亦預告咗佢嘅行車表現，以至車廂陳設都會好似貨Van咁。

竟然冇電趟門

歐洲車廠推出MPV，多年嚟俾到我嘅感覺，我只會用一個字形容，就係「硬」。由於全部都係由貨Van改建而成，所以車架同車體都用上好好嘅鋼水，而車內嘅飾件以至座位設計，都用返貨Van嘅基本配置。Rifter雖然已經由外表至內在都加入大量MPV化、甚至SUV化嘅設計，但一睇佢嘅七座位佈局就知佢「本性難移」。點解咁講？因為只有由貨Van改造而成嘅MPV先會有Rifter偏高嘅地台，而且2+3+2座位佈局全採用獨立座椅，每一張都可以獨立摺疊椅背，最後排兩張更可以個別拆走，將最後一寸空間都騰出嚟，令平坦嘅尾箱更大。由於最後排坐得比較高，而且兩旁就係後輪拱位置，所以乘坐空間同舒適性都只係一般，載小朋友就最適合，如果係成年人坐，最好當然係連中排都摺平，雙腳伸直坐都得。Rifter後座門用咗慳位又方便嘅雙趟門設計，不過絕對「兒童不宜」！唔係有咩18禁嘅嘢，而係一雙趟門完全冇電動功能，小朋友難以開關之餘，就算係成人，如果部車喺斜路，一樣十分難搞。

雖然中排上車要小心控制開閂車門，但車廂內嘅舒適性同方便性都幾高，真係似足一部MPV。例如喺前座背有摺疊小餐枱，根據唔少MPV用家嘅使用經驗都一致讚好，尤其小朋友更加喜歡。此外，由於地台接近平坦又有後座冷氣，其實整個乘坐空間舒適性都唔錯，就算香港版本冇咗巨大嘅玻璃天窗，都有非常好嘅視覺空間，同最後排有頗大對比。如果轉為前座乘客或駕駛者，更深深體會到Rifter嘅「MPV化工程」做得相當唔錯，甚至比起日本車高級。

首先，放喺駕駛者眼前嘅軚盤形狀與常見嘅唔同，橢圓形之餘仲要粗身，握持手感好，有啲似揸方程式賽車。雖然錶板未用到顯示屏，但中控台都有touch mon.，所有設定都可以簡單搞掂。而比較有趣一點係Rifter嘅波箱，雖然採用一個相當小巧嘅扭掣，同埋又有電子泊車手掣，但由於Rifter喺歐洲係有棍波版本，所以預留咗一個相當巨型嘅波棍枱，連埋儲物櫃將前座狠狠地分隔開，視覺上係幾有型，但就影響咗空間感。

引擎波箱都有驚喜

近年嘅細容積三缸引擎真係愈來愈普及，已經唔再局限喺細車仔上面，可以喺唔同車種上面都見到，跑車都用得啦，好似Rifter呢啲中小型七人車梗係冇問題啦！一打開頭冚就可以見到相當小巧嘅1,199c.c.嘅三缸Turbo引擎，呢一個正正就係三缸引擎優點，細小、輕量，為輸出帶來低負擔亦可增加車廂空間。引擎輸出130匹馬力及23.5kgm扭力，對於一部1,515kg車重嘅車嚟講可謂合理，試車時載三個人遊走飛鵝山一帶山路，當然好氣好力啦，但由於試車限制載三人，試唔到滿座效果如何，但睇輸出數值1,750rpm就有23.5kgm扭力，相信就算坐滿七人上山都冇問題。試車嘅時候，我以為呢副三缸引擎會係全車最大賣點，但原來波箱都係精彩之處。Rifter用上8前速自動波，而且仲有埋軚盤加減撥片，如果用全自動模式駕駛，波箱反應都幾快，基本上起步唔使一陣就已經連跳三、四個波段，只要均速行駛一小段路就已經用上五波或六波，非常明顯係為慳油而設，如果想下下都用盡轉數去加速或自已動手拖波，就最好撳個「M Mode」，全程由自己話事轉波。

以一部貨Van改造成MPV，Rifter已算做足本份，佢嘅駕駛感同乘坐感未必有日本車咁好、咁舒適，但亦正正因為佢係Van底子，車身紮實程度同尾箱空間真係好啲。如果香港車主仍然抱住一個「日本MPV係最好」嘅心態去買車，Rifter根本冇可能令你回心轉意，因為駕駛Rifter、乘坐Rifter，以至操作Rifter嘅設備，都同你用慣用熟嘅日本車唔同，如果先入為主就會不自覺去比較。試試先book個時間試車，親身感受完，再佢判斷都未遲。