平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

第四代柴油Sorento試車

有15年死期係咪真係咁趕客?

Kia 旗下SUV 車皇Sorento 第四代上年年尾到港,上一代熱賣程度有幾勁,走出街望望有幾多部行緊就知道有幾好賣。點解會咁好賣?簡單講就係Sorento 性價比極高。唔知今代又可唔可以延續呢個氣勢呢?


新一代Sorento 同之前一樣,分別會有電油或柴油版本出售,而今次代理借出畀我哋試嘅係後者GT 版。柴油版除咗有頭轆同四驅之分,一個重大嘅改變就係清一式全部都係5座位,上代有嘅7座位就取消咗嘞!新車動力系統方面採用2.2 公升直四Turbo 引擎,馬力有202匹(PS)、峰值扭力440Nm,配合8 前速濕式孖極力子波箱。



上面都提過Sorento 車系都係性價比高,以當日試嘅頂級版為例,新車價$328,000。比起6座位嘅電油四驅版平$70,000。車入面嘅設備例如12.3 吋電子錶板、10.25 吋中控屏幕、全車有多達5個(前2、後3)嘅USB 充電插頭、無線充電裝置、電暖軚環、氣氛燈、投射式顯示屏(Headup Display)、12個喇叭嘅Bose 音響系統、盲點提示、360泊車系統、車道保持輔助系統等等,要有咁足料嘅裝備以$328,000 呢個價錢唔係有幾多對手可以做得到。



駕駛感方面,由於係柴油引擎嘅關係動力輸出早起由千幾轉已經開始一直到兩千八百轉左右都非常充足、好力,日常燈位起步同同級對手絕對唔會輸蝕,但不過轉數一過三千轉之後動力流失相當快。此外,柴油版專用嘅8 前速濕式孖極力子波箱,轉波反應直接爽快而且平穩,不論油耗同反應相信表現絕對唔會差得過只得六前速嘅電油版本波箱。



新Sorento 採用新嘅第三代中型SUV 底盤,提供更多嘅車廂空間,以五座位嘅柴油版為例尾箱空間就有705升,放兩個大行李絕對冇問題,前後兩排座位都有好多空位夠晒闊落。另外新車車架同上一代比鋼性更強,雖然車身高度稍稍高過上一代,但試車之後覺得部車轉彎時都唔會覺得車架扭動得好厲害,可以輕輕鬆鬆入彎。



外型方面,最搶眼莫過於係車頭鬼面罩嘅「虎鼻」設計,左右兩邊嘅大燈融入鬼面罩,再加上兩邊嘅LED 日間行燈,廠方就話呢個設計似「Tiger eyeline」老虎眼線嘅形態,確實呢個設計係令人更加容易認得出新Sorento,似唔似老虎眼線就見仁見智嘞!


雖然柴油Sorento 睇落整個Package 都非常「中」一般香港家庭車嘅需要,柴油油費平、車價又唔算貴($328,000)、載到人之餘又放到嘢,再加埋一大堆好用電子裝備。不過事實歸事實買呢部車有一個心理關口要衝破,就係因為佢係柴油商業車,所以佢有15 年「死期」,換言之15年後部車就一定要劏。看似唔著數,不過細心諗諗如果同冇死期嘅電油版比,15 年後車價又剩底幾多、加埋年中慳落嘅油錢,埋單計數之後新柴油Sorento 又係咪真係咁趕客?












Kia Sorento 

引擎: 2,151c.c. 直4Turbo 柴油 

馬力: 202PS /3,800rpm 

扭力: 440Nm/1,750- 2,750rpm 

傳動: 8速雙離合波箱

車身: 4,810 X 1,900 X 1,700(mm) 

軸距: 2,815mm 

車價: $328,000起 

查詢:3428 8288 Hyundai Hong Kong


Text、Photo: Daniel

 覺得這文章有用?按下面的按鈕分享給你的朋友 

你可能感興趣的文章