Audi 辣揭背S3OpenCar

Audi 辣揭背S3

dman
05 May 2021
( 13 Comments)
3197

Golf R 死敵率先到港

Volkswagen 8 代Golf R 香港行貨未有消息，不過佢嘅死敵Audi S3 就率先嚟到香港。今次我哋測試嘅係S3 Sportback quattro Vorsprung Edition，咁同標準版S3 Sportback 有咩分別呢？換咗19吋五輻式車軨同埋前排櫈用咗Nappa真皮加鑽石型車線。S3 用到兩公升直四Turbo 引擎，最大馬力輸出有310匹（hp）、峰值扭力400Nm，加埋quattro 四驅系統同7 前速S-tronic 自動波箱，0-100km/h 加速時間只需要4.8 秒。

車入面嘅設計同現今Audi 車系都有相似嘅地方：12.3 吋電子錶板、10.1 吋中控屏幕、真皮軚環等等，呢部S3 以內籠嚟講改動得最大嘅地方一定係佢嘅波棍，由以前一支長長嘅波棍頭變成一支非常「的式」嘅波棍，呢個設計係咪似曾相識呢？喺Porsche 上面就咪見過囉！唔知係咪大家都係VAG 集團呢？不過呢個設計又唔知啱唔啱大家口味？除咗形狀唔同咗之外，以前D 波向左推即變成手動＋／－波亦隨著新波棍登場而消失咗嘞！

作為一部高性能揭背車，除咗跑得之外實用性當然重要，S3 全車入面總共有4 個Type C 插頭可以畀部電話全天候充住電。而車內空間方面，司機位調較好5尺8 吋高嘅坐姿之後，後座頭頂有一個拳頭空位、膝頭同前座都有兩個拳頭，空間夠用而唔會有好明顯嘅壓迫感。不過S3 冇電動尾門而且打開之後把手位置都幾高，如果身型比較矮小嘅朋友閂尾門時可能就會辛苦啲嘞！

試車時第一個感覺會發現S3 嘅原裝喉聲已經好沉實，再加上冇諗到原裝已經有嘅外放式放氣嘩佬，兩樣嘢加埋份外覺得部車更加有跑味，但呢啲都係觀感上「自娛」姐，到底部車駕駛感又如何呢？當日去飛鵝山試S3 喺山路上嘅表現，行咗一少段路就會發現部車嘅指向性高同靈活，而且喺山路上又可以突顯部車嘅車架夠晒硬淨，點扭都冇問題，兩個字：「好玩」。至於行返普通平路又如何？S3 加速力喺現今揭背車仔入面未必擁有最具爆炸性嘅性能，再加上Turbo Lag 同隻19吋大車軨問題令轉數喺3,000 rpm之下加速力表現麻麻，不過只要過咗呢個轉數之後爆出嘅力量就會襯返車外面嘅「S」車章，即時變返部好辣嘅揭背車仔，而值得一讚嘅S tronic 自動波不論上、落波反應都夠晒快，令趣味又提高返唔少。有熱血嘅揭背車車主少不免都會改裝下部車，試完S3 後個人認為可以從避震方面落手，因為原裝避震斯文行車時有感覺少少跳但反而激進少少入彎又唔夠企，真係有「唔上唔落」之感，所以如果車主買車後不妨考慮改改套避震，好睇又更加好彎！