品牌
继续
车类
继续
更多
继续
話說2019年到港嘅Volvo V60旅行車，我一直都未有時間去試車，更甚係我直情忘記咗佢嘅存在，之後一直都冇再向代理借車測試。直至早前，同事向代理約了試車時間，我先有機會同佢近距離接觸。
旅行家
旅行車喺香港市場從來都係小眾玩意，全因用車文化差異，幾十年前啲人只鍾意「有頭有尾」嘅房車，如果要大啲嘅載物空間，就會買貨車，旅行車呢啲「有頭冇尾」嘅外表，唔係一般車主可以接受。嚟到近廿年，旅行車曾經有一段時間成為潮物，2000年左右大量日本水貨車流入香港，Audi嘅A4 Avent同A6 Avent又被IT才俊力追，之後個個都喺車頂加個架，有理冇理都整塊滑浪板或單車架，當年都算係一個潮流指標。
話明係潮流，當然會有退卻一日，隨SUV時代來臨，莫講話旅行車被打入冷宮，就連最傳統、銷路最穩定嘅房車都失勢，直接令汽車入口商都減少引入旅行車。雖然香港市場對旅行車款冷淡，但好彩歐洲市場對旅行車仍然「有情有義」，喺SUV時代下，新款旅行車仍然有推出，更難得係買家支持！
Volvo可以話係SUV時代下，其中一間銷量穩步上揚嘅車廠，難得係Volvo一面順應潮流推出SUV之餘，亦有繼續推出旅行車。根據廠方嘅網頁顯示，Volvo現時有V90及V60兩款旅行車，兩款都分別喺香港市場賣過，不過好可惜V90已經冇再輸入，現時只餘下眼前呢部V60 B4 Momentum。
小升級
其實喺2019年底呢款V60已經引入咗香港，咁呢部係咪facelift？又唔係喎，代理話佢做咗個動力更新，首次加入Mild Hybrid輕混能系統，喺197匹馬力上，可以額外增加14匹馬力，扭力就有40Nm增長。由於V60 B4 Momentum版本只係用前輪驅動，所以負荷都比較低，以大概210匹馬力輸出嚟講，就算升級到用18吋胎軨，平時駕駛都綽綽有餘，同身負四驅系統嘅版本有明顯分別，起步更爽快，而且車頭指向性更靈活，我個人就buy前驅版多啲。可能有人會話：「有份四驅看吓門口好喎，安全啲！」其實一般正常用車，唔係次次揀落雨天先嚟飛車，四驅系統其實好少機會發揮，有當然係一個好防線，但車重增加之餘，負荷亦更大，耗油量自然增加。
小改良
話V60 B4 Momentum唔係facelift，係因為外表上冇重大改變，最標誌性嘅頭尾燈組完全冇改過，反而車廂內就多咗唔少新嘢，又或增值升級。一坐上前座打算調校合適坐姿時，就發覺前座新增位置記憶同電動腿部延伸功能，令坐姿更稱心滿意。此外，駕駛者一邊調校坐姿時，亦會見直視擋風玻璃有HUD抬頭顯示屏，簡單行車資訊都可以睇到晒，如果想閱讀更多資訊，由8吋升級至12.3吋嘅彩mon.就幫到你，有更大嘅顯示效能，睇得更清。
不過有一點可見Volvo今次為V60小升級係幾細心，就係將波棍款改咗之餘，仲將旁邊嘅儲物櫃加入手提電話無線充電平台，唔使另外再插USB線。不過有一點我對V60 B4 Momentum有少少意見，就係取消後座前方嘅冷氣出風口，喺咁樣嘅天氣，加上巨大天幕車頂，兩側B柱嘅風口出風量其實唔係好夠，坐中間嗰位乘客要有一定忍耐力。
總結
其實Volvo已著手生產電動車，唔係開發階段，係堅量產，未來數年必將全面取締燃料引擎，而Volvo喺近年已將引擎系列整合至只得一台2.0公升，分別只係用上唔同形式嘅輔助，例如加Turbo、加Turbo同Supercharger，就算最頂級版本，都係再加多個Hybrid系統了事。由此可見，Volvo早早已將發展重心轉到新世代能源之上。雖然動力形式上會翻天覆地大改變，但我深信Volvo對旅行車嗰份執著同熱誠，係唔會因此而減退，當然旅行車能否承傳落去，其實有賴車主嘅支持，如果新世代嘅用家仍然認為高頭大馬、操控欠奉嘅SUV先至係王道，咁旅行車就唔單止喺香港市場消失，更甚係車廠都唔生產就弊。最後，真係要為Volvo澄清一下，不少人以為新世代Volvo所有車已轉為中國製造，事實上中國只係其中一條生產線，只有部份係「Made in China」，就以V60為例，產地係比利時，Belgium呀！
Volvo V60 B4 Momentum Spec.
引擎：1,969c.c.直四Turbo配Mild Hybrid
馬力：197hp/4,800rpm（電池14hp/3,000rpm）
扭力：300Nm/1,500-4,200rpm（電池40Nm/2,250rpm）
傳動：8前速自動，附+/-模式
車身：4,761 X 1,850 X 1,432mm
軸距：2,872mm
車價：$439,800
查詢：2927 3388（Wearnes Motors）
Text、Photos：Chris
覺得這文章有用？按下面的按鈕分享給你的朋友
你可能感興趣的文章
16 Jul 2021
14 Jul 2021
18 Jun 2021
07 Jun 2021
02 Jun 2021
