最緊要夠好飛！G 世代M3 Competition OpenCar

最緊要夠好飛！G 世代M3 Competition

dman
16 Jul 2021
( 13 Comments)
3212

BMW M3 Competition 試車

記得喺官方網上發佈BMW 第6 代、代號G80 新M3 嘅時候因為新設計鬼面罩，引嚟唔少「熱烈」嘅討論。外貌講就講咗好耐，至於好睇／唔好睇其實好個人唔喺到討論，但到底行車感覺又如何呢？終於等到代理借出試車，仲要係比標準版M3 更辣嘅Competition 版，當然要試試佢行街咩感覺啦！

新車採用由M4 GT3 賽車都用嘅3 公升直6 TwinPower Turbo 引擎，馬力輸出510匹（hp）、峰值扭力650Nm，而今次試嘅版本並唔係四驅xDrive版，所以同傳統M3 一樣都係尾轆驅動，配合埋8前速M Steptronic 自動波箱之後，0-100km/h 加速時間3.9 秒就完成。值得一提標準版M3 可以配備6 前速手波，不過Competition 版就只有8 速自動波箱選擇，唔知有冇車主會因為呢個原因會轉買普通版呢？但係少30 匹同100Nm 扭力喎！

呢副S58 引擎喺F 世代嘅SUV 車型X3、X4 已經用緊，而新G 世代就第一次用，650 Nm 強大推背感毫無疑問非常之吸引，由3,000 左右一路上到5,500 轉都可以享受到部車畀到嘅樂趣。但雖然部車嘅爆炸力好強，但個人覺得低扭表現麻麻，令到3,000 轉前後反應分別相當大。波箱方面，由上代嘅7 速換成8 速M Steptronic 自動波箱，表現比之前更加快同流暢，每次上、落波都好快。至於喺出色嘅車架、底盤配合之下彎路表現入彎夠晒穩定，不過可惜試車當日兩條Pilot Sport Cup 2 尾軚嘅軚紋已經行得7788 所以試唔到十分熱血嘅揸法，但可以肯定嘅係比平常稍稍高速嘅揸法佢絕對應付有餘。提到操控，車入面有兩個新開發嘅系統： M Traction、M Drift Ananlyzer，頭者令車主可以自己選擇由1至10 嘅牽引力，而後者就有趣嘞！如果你玩緊漂移，部車會紀錄同分析每次漂移嘅資料，包括漂移時間、距離、角度等等，咁就知道晒你漂成點，有咩地方要改進，喺到建議各位車主如果有機會搵到個空地試車不妒可以試下呢個功能！M3 Competition 車身呎吋長4,794mm、闊1,903mm 體型都唔小，睇返資料佢比上一代更大部，所以試車之後覺得部車真係唔算靈活，做啲穿插動作就可能要多啲空位嘞！除咗體型大之外，M3 Competition 嘅重量都唔少嘢，呢部「肥仔」有1,805KG 再加上有返咁上下嘅戰鬥力，制動要求相對地高，好在車入面嘅前六、尾一嘅鮑魚非常敏感又夠晒好收，點解會好敏感呢？又會唔會過份地敏感呢？原來新車入面有Intrgrated Brake System，車主可以自己調校部車嘅制動反應喎！

車入面嘅設計有跑感之餘用料亦都非常高級，真皮軚環、12.3 吋輕觸式中控mon.、10.3 吋電子錶板、Head-up Display、冷暖真皮櫈全部都有齊，特別係香港夏天咁熱一張有冷風出又坐得舒服嘅櫈對於一部過百萬嘅房跑車係一樣必須嘅裝備。至於實用空間方面，M3 Compition 比起同一時期出嘅M4 比一定好，起碼去後座唔使捐入車，而係打開車門就上到車先啦！