平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

多一次機會Peugeot 3008 1.2L

法國車仲有得做

香港人買車存在羊群心理,以前個個用英國車或西德車,日本車冇人留意。好喇,有人話日本車又平又正時,就開始多人買,接住落嚟再有人話日本車耐用、唔識壞,日本車從此平步青雲,站穩陣腳。同一條成功方程,現正被韓國車套用,上位中!咁一直被人話有品味嘅法國車又點?法國車樣靚身材正,相信冇人會反對,不過咁惹火自然有啲脾氣,成日聽傳聞話法國車易壞,要以感性蓋過理性先買得落手,事實係點只有用家先會知。但種種傳聞都令法國車一直彈唔起。就以Peugeot為例,最風光嘅時候係2000年左右,一款206有齊三路大軍,206 GTI攻hothatch市場、206 XT首設玻璃天幕,而206 CC就厲害,用上當年罕有嘅電動開關硬頂外,車價更平到21萬,營業員真係收訂都收到手軟。


車頭用咗電鍍鬼面罩及金屬頭唇,多咗啲高級感覺。


全新嘅車尾造型比上代更靚仔、更粗獷,似返部SUV!


當年206新車gimmick多多,令Peugeot喺香港前所未有咁受歡迎,喺街上面遇上嘅機率,大概同今日嘅VW Golf差唔多吧!咁現時嘅Peugeot又點?大概兩年前、308 SW之後已經唔再引入私家車,只留低Expert貨Van,單天保至尊撑起整個品牌。據知Expert有唔錯市場反應,搵到餐飯食,正因為咁,代理今日再次投放資源引入私家車,一嚟就係第二代新款3008,唔係炒冷飯之作,外表有型、內籠夠潮,法國車死忠粉絲冧唔冧先?


用咗新底盤令車長及軸距都增長,但車高就矮過舊款。


最新嘅第二代3008喺2016年巴黎車展上出現,2017年上市,香港市場雖然遲咗年幾先有新車,但冇所謂啦,對粉絲嚟講最重要係有新車、唔好淨係得部Expert。今代3008用上EMP2模組化底盤,呢類底盤好處係可以因應組合而成不同尺碼,甚至後懸掛嘅形式都可以改變,總之一個底盤可以造出多個車款,為車廠慳返唔少錢。呢個EMP2底盤同時用喺308、408、5008、Expert,甚至Citroen Picasso之上,又揭背車、又MPV、又貨Van,你就知佢幾多用途。


雖然前座採用全手動調校,但無損舒適乘坐性。


雖然冇天幕車頂增加空間感,但用咗全平地台,令腳部空間都有好好表現。


後座背可以向前翻摺,令尾箱空間更好使好用。


新款外表比上代多咗粗獷線條,更似一部SUV,而且車身長咗82mm、闊咗4mm及矮咗15mm,一望就覺得大部咗。此外,由於用咗新底盤關係,軸距都增長62mm,可以預料車廂空間都會大咗。一打開車門,最引人注目係外表精美、細小而平底嘅兩點真皮軚盤,實在似賽車軚盤咁嘅手感。此外,雖然唔係用電動調校座位,但座位用料及形狀都睇得出落本之作,腿部及肩部有出色承托。一直以來法國車都注重車廂硬件設計,好似3008咁,軚環靚、中控台用料獨特、更甚者連音響都用上法國名牌Focal,但今時今日大mon.錶板當道,3008都係時候與時並進,增值一下呢啲花巧嘅軟件先可以吸引到人。中控台冇乜多餘按掣,只有幾個主要功能選擇,選擇好功能後,就全靠上方嘅大touch mon.去微調各種設定,感覺hi-tech咗!此外,更重要係駕駛者面前整個錶板都改為彩mon.,一來可以顯示更多行車資訊,二來錶板佈局有多種變化,保證你唔會悶。


彩mon.錶板可以同時顯示多種資訊及變化多種圖案。


兩點式軚盤仲有用平底設計,揸上去手感好似賽車。


法國車當然用法國名牌Focal音響,識音響就知呢個牌子係好嘢。


喺touch mon.可以操作多項電子安全系統。


中控台上只有幾個掣,主要用作選擇功能。


現時3008嘅意向賣價係$288,000,車上嘅安全設備已達到德國高級房車水平,倒後鏡有盲點警示系統、行車線穩定系統、自動緊急剎車系統、駕駛者注意提示系統,甚至半自動泊車系統及360度泊車鏡頭都有,講設備同價錢都冇得輸!不過有一點值得留意,3008暫只有一個動力組合提供,引擎採用1.2公升三汽缸turbo形式,最大馬力131匹、峰值扭力23.5kgm,配6前速自動波箱。「咁大部車用千二偈,夠唔夠力?」相信好多人都有呢個疑問,我可以大膽講,憂慮只係多餘,因為呢個輸出用喺車重1,450kg嘅3008上已綽綽有餘,你唔會用3008去玩0-100km/h或經常180km/h行車吧?呢副引擎好處係輕身而且有好好低轉扭力表現,起步表現爽朗,低、中速加速表現比1.5公升自然吸氣引擎更好,如非車速上到130km/h打後,都冇腳軟表現。另一重點係細容積有更低耗油表現,廠方數據係5.2L/100km,拍得住啲hybrid車!


1.2公升turbo引擎已經有131匹馬力及23.5kgm扭力,喺香港地使用真係非常夠用。


6速自動波其實都有+/-模式,但只可以喺軚盤撥片操作。


Peugeot 3008 1.2L Spec.

引擎:1,199c.c. 直三turbo

馬力:131ps/5,500rpm

扭力:23.5kgm/1,750rpm

傳動:6前速自動、附+/-模式

車身:4,447 X 1,841 X 1,624(mm)

軸距:2,675mm

車重:1,450kg

耗油:5.2L/100km

車價:$288,800起

查詢:AutoFrance(2834 4233)

 

Text:Chris

 覺得這文章有用?按下面的按鈕分享給你的朋友 

你可能感興趣的文章