最大眾化混能車 Toyota Comfort Hybrid Taxi

chris
15 Mar 2019
( 13 Comments)
3999

翻天覆地大革新

Toyota Comfort Hybrid Taxi

老實講，喺香港搭車真係方便，就算搭唔到巴士或地鐵，伸一伸手就已經截到的士，而眾多公共交通工具之中，的士嘅收費雖然最貴，但偏偏又多人搭，方便勝於一切。正因為的士喺香港非常普及，所以對於冇揸車嘅人嚟講，的士就係最私人、最專屬嘅交通工具。有冇留意香港最常見係咩型號的士？冇錯，係街上面有9成都係Toyota Comfort，如果Toyota將Comfort轉款，就對好多人都有影響，起碼會諗：「新款車載幾多人？」「坐得舒服嗎？」「有冇自動門？」唔使再諗咁多嘞，新款Comfort已經升級成Comfort Hybrid，比以前更高級。

新款Comfort Hybrid大轉款，將會影響全港的士業。

日本的士直接入口

其實新款Comfort Hybrid喺去年中已經有極少數喺香港試行，根本就係將日本本土嘅JPN Taxi直接入口改裝而成，外表有啲似經典嘅London Taxi，但就用咗簡潔車身線條，最正係車頭兩邊沙板裝咗電鍍倒後鏡，成個outlook即時classic晒！新Comfort Hybrid嘅B Platform來自Spade同Sienta，但車身同軸距都進一步拉長，比可以載7人嘅Sienta更長！新的士外表classic，但左邊車身用上電動趟門實在太正，一來可以享有極寬闊嘅門口位置，二來又方便設計出特低地台，令乘客上落車更方便，完全唔需要低頭屈身就可以入到後座。

香港市場直接取用JPN Taxi，只係外表加上本地的士顏色。

首次用電動趟門，令後座乘客上落車更加方便。

座位騰出更多空間

新的士唔單只外表耳目一新，坐入車廂仲feel到佢與時並進一面，先係近前乘客位背部有兩組手挽，方便有需要人士扶住上落車，而且後座兩側天花都有加長嘅手挽，就算司機大佬揸得快咗、劈個急彎，乘客都唔會滾地葫蘆咁。雖然新的士未去到有自選式多媒體娛樂，但家陣人人都有手機，手機就係個人娛樂系統！有見及此，前座設有USB電源插，乘客可以一上車就充一充電，應急非常有效。此外，後座空間真係大到無倫，唔單只可以翹腳坐，車廂高度肯定連NBA球員都唔會投訴！配合埋可獨立調節風量嘅風機，乘客坐得比以前舒服。

原來後座空間咁大係別有用心，後座可以向上摺起，地台就可以放超過十件行李！如遇上特長貨物，前座乘客位又可以向前摺疊，咁就可以同後座貫通置物，可見載物靈活性比以往嘅Comfort大得多！此外，後座係可以分開兩邊摺起，只摺起一邊已可以容納一張輪椅連乘客，實用到不得了，只不過實試手動打開輪椅上落斜板都幾花時間，就算熟練使用都要10分鐘先完成，未必個個司機大佬肯花時間去用。

後座空間大到離譜，腳位同頭位空間都非常充裕，NBA球員都載得落。

要司機自己搭嘅輪椅斜台，大概10分鐘先搞得掂。

後座天花有風機調節掣，乘客可以自己話事風量。

司機要啲時間適應

如果作為新款Comfort Hybrid嘅乘客，真係冇乜好投訴，乘坐舒適性比舊款高幾班，換轉司機角度又點睇？首先，我會覺得沙板倒後鏡要少少時間去適應，初初用會經常望錯A柱位，只要習慣咗，就會發覺雙眼切換路面同沙板鏡視點冇咁攰，而且車身盲點位大幅減少，值得推介！此外，以往嘅Comfort已將死火燈掣設於軚盤背，但新一代更窩心，索性將個死火燈掣放喺軚盤三點鐘位置，方便司機停車上落客時發出警告。中控台方面，只有音響、收費咪錶同波棍，冷氣設定掣就放喺軚盤右下方。不過全車可供存放物件嘅位置唔多，只有波棍下有少少位，大概可以放下腰包，背囊都放唔到。位於兩張前座肩膀位中間，首次裝上找贖兜，以後乘客俾車費可以禮貌地直接放於找贖兜，而司機找錢又可以放喺兜裡，成件事斯文晒，而據知咁樣找贖，乘客因為唔想袋咁多零錢，而當貼士咁「豪」俾司機。

新款車廂即時潮晒，同私家車冇咩分別，係唯獨是儲物空間較少。

軚盤增設死火燈掣，絕對係非常方便嘅設計。

冷氣操作掣設於軚盤右下方，操作相當就手。

混能引擎更加慳錢

新世代Comfort Hybrid採用1,497c.c.直四LPG引擎，單單引擎可輸出74匹馬力，而摩打就有61匹馬力，雖然用上CVT波箱，喺偶發性加速時嘅反應未必及傳統自動波箱咁有衝刺感，但摩打嘅低轉扭力實在豐厚，起步完全唔會覺得乏力，而CVT波箱嘅順滑表現仲同整個動力系統非常配合，就算高轉數時嘅運作聲較大，都唔會影響到順滑表現。據已揸咗新Comfort Hybrid已有幾個月嘅司機表示，佢嘅用氣量比舊款少，折合大概$0.27/km，慳到一個點！一如其他嘅Toyota Hybrid車輛，波箱設有「B」（Brake）波，作用就好似拖低波一樣，減少落斜剎車次數。此外Comfort Hybrid都有EV mode，可容許特定環境下全電動行車，不過相信冇乜司機會用得著，搵食車下下都踩盡啦，仲會輕住油門行車咩？不過有一樣嘢一定要話俾大家知，眼前呢部Comfort Hybrid係去年7月出牌行街嘅測試車，至今只係7-8個月車齡，總共已行走近110,000km，係一般私家車行8-10年嘅用量，但行車表現卻非常接近新車，可見Toyota出品嘅耐用性真係好瘋狂。