平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

Bye Bye甲蟲車

Volkswagen Beetle歷史回顧

唔理你係老一輩抑或後生車迷,都肯定識得Volkswagen甲蟲車Beetle,但再好嘅嘢都會成為過去,因為最後一部Beetle喺早幾日離開咗墨西哥生產線,為呢個有近80年歷史車系劃上句號。甲蟲車停產,作為車迷嘅你同我,唔多唔少都會有啲傷感,但就趁住呢個時刻,我哋一齊回顧下甲蟲車光輝歷史。


最後一部Beetle已經駛離咗墨西哥生產線,直入Volkswagen博物館作收藏之用。


三代Beetle甲蟲車各有特色,呢個車系終於劃上句號。


第一代Beetle設計最經典,用後置引擎、後輪驅動布局。


希特拉任命

第一代甲蟲車出現,係上世紀30年代由希特拉任命Ferdinard Porsche(保時捷博士),為德國國民造一部平價用車,佢要求車輛載到2個大人同3個細路,時速去到100km/h,售價要喺1,000馬克以下。

結果,甲蟲車喺1938年出現(稱Volkswagen Type 1),橫誇二戰嘅Beetle,生產之初幾乎全數用喺軍事用途,到戰後才開始喺歐洲風行,之後仲追加咗開篷版同喺70年代面世嘅Super Beetle。最後一部喺德國生產Beetle喺78年完成,其後全數交到包括海外廠房生產(包括比利時、芬蘭同南斯拉夫等),第一代Beetle一直賣到2003年先停產(總產量21,529,464)。


記得1968年電影《鬼馬神仙車》,就係用第一代甲蟲車做主角。


The New Beetle

時間去到90年代,Beetle地位一早已經畀Golf取代,但唔少Volkswagen車迷仍然對甲蟲車念念不忘,所以車廠決定喺1998推出The New Beetle(第二代)。為咗迎合返90年代汽車科技發展,第二代Beetle唔再用後置引擎、後輪驅動,改用咗前置引擎、前輪驅動,而且車身經過大幅擴大同圓渾化,多元化引擎組合仲有齊1.4、1.6、1.8T、2.0同3.2等型號。

可惜嘅係,與New MINI同為復刻經典車嘅The New Beetle,銷量遠遠唔及對手,更加難以同第一代Beetle相提並論,全球銷量只是一般。


第二代Beetle外型變到好圓渾,但整體設計仍然忠於原著。


第三代發展

2011年第三代Beetle接力登場,今代外型最大變化,係將上代圓滑線條變得硬朗化(A柱角度加大),車身長同闊增加152mm同84mm,高度下降12mm。新世代LED日行燈、多功能屏幕一律列為Beetle標準裝備,同時車廂設計更加有型。

依舊有硬頂同Cabriolet開篷版第3代Beetle,分馬力105匹1.2 TSI同馬力160匹1.4 TSI(雙增壓引擎),頂級版改用Golf GTI相同200匹2.0 TSI引擎。可惜,第三代Beetle全球銷量依然麻麻,所以Volkswagen決定喺今年7月將佢停產,暫別車壇。


無論係第一、二、三代Beetle,都加有優皮開篷版。


Text:Lam Tsz Cham

編輯者: lam tsz cham

唔理係兩個轆抑或四個轆,只要有速度嘅嘢就鍾意。由細到大睇車書多過睇教科書,夢想係40歲前過退休生活,日日揸唔同嘅車周遊列國。

 覺得這文章有用?按下面的按鈕分享給你的朋友 

你可能感興趣的文章