不死鳳凰浴火重生 Toyota Century IIIOpenCar

不死鳳凰浴火重生 Toyota Century III

alextamhk
23 Jun 2018
( 13 Comments)
800

被譽為天皇座駕嘅Toyota Century，終於響6月22日正式發表第三代車型，基本售價亦只係1,980萬日元........

二千萬日圓出車

儘管Century已經係豐田家族最最最頂尖車型，但係基本售價亦只係1,980萬日元，比起歐洲傳統華品牌嘅頂級車型依然平一截。當然，使得起錢的企業總裁們，大可幫襯其專屬客製化服務，打造心目中理想嘅天皇座駕。

骨灰級手工打造

Toyota Century III正式量產版本，與2017年東京車展上嗰部概念車幾乎無任何分別，愈睇愈似係世紀＋紅旗＋勞斯萊斯嘅混合體，可能氣勢呢家嘢係有某啲特定基因。在保留代代相傳嘅Century形態之下，好多細節都已經與時並進，例如附有AHS（Adaptive High beam System）系統嘅三點式LED方型大燈、LED 長條形尾燈等，此外雙層式鬼面罩（內層「七寶文」紋樣網、外層直條間柵）配合中央鳳凰廠徽，將日本傳統美學重新演譯。車身尺碼為 5,335×1,930×1,505mm、軸距 3,090mm，屬日本車裡的橫綱級別，行出嚟有一度「氣」存在。

Century車身漆油造工精益求精，由東富士工場的資深工匠以「水銳化」方式作三次打磨漆面，然後再經拋光鏡面程序而成。唔講你唔知，Century連顏色取名都零舍講究過人：黑色是「神威」、深藍是「摩周」、亮銀色叫「精華」，新加入嘅深雲母紅色則稱為「飛鳥」。

作為豐田的頂峰之作，每部車都由人手慢工細緻打造出嚟，作為頂尖身分象徵嘅鳳凰車徽，原來係由技藝精湛嘅大師傅逐隻雕琢出嚟，再經過五層塗裝與五次反覆燒烤，並通過最後鑑定後至會裝上車身。

天皇級享受

軸距增長65mm，再加上近似雙獨立座椅的三座式後排座位，完完全全把後座乘坐感放喺首要位置。車廂飾版可選擇雲石花紋圖案或原色梣木；座椅可選擇灰色、純黑色或米色純羊毛織物，或純黑色或Fromage 奶油色頂級真皮；在車內頂篷採用「紗綾型」紋路織物；車門窗簾、中控台飾板均用上日本古典「七寶文」紋樣。將電動調節後座（帶按摩功能）幾乎分隔的中央手枕，附有與Lexus LS 同級嘅控制面板、可以直控制位於前座中間嘅11.6寸屏幕及娛樂系統、 20支喇叭立體聲音響系統，無非都係想畀到乘客最舒服嘅行車享受。

日本惟一V12絕種

新Century可以視為上代凌志LS600hL嘅終極變身，廠方特別響車架吸震與吸／隔音方面加料，例如特別調校過AVS可調式電子氣壓避震、使用大量結構粘合劑提高車架剛性，甚至與石橋輪胎一齊同開發更高舒適性和減震能力新款車胎。日本惟一國產V12引擎已經成為絕響，新世紀用上上代 LS600hL嘅混能動力總成，包括：5.0公升D-4S直噴V8引擎及THS II鎳氫電池驅動摩打，在寧靜與性能方絕對沒有令人質嘅地方；引擎最大輸出381PS/6,200rpm馬力、52.0kgm/4,000rpm扭力；電動摩打則有224PS馬力、30.6kgm扭力，綜合最大馬力為43PS。

最頂級電子安全配置

Century配備咗豐田目前最先進嘅主動安全系統(Toyota Safety Sense) ，車頭鬼面罩內藏微雷達與擋風玻璃掛設嘅智能攝影機配合，形成4項主動安全技術，包括：AHB (Automatic High Beam) 智慧型高燈系統、PCS(Pre-Crash Safety System)偵測行人預警式防護系統、LDA(Lane Departure Alert)車道偏離警示系統，以及DRCC (Dynamic Radar Cruise Control System) 雷達感應式車距維持巡航系統等，其他設備仲有後方盲點偵測、後方交通警示和停車警示系統。如果真係咁唔好彩炒車，Century內置「Help Net」功能，當SRS氣袋爆出一刻自動撥打緊急救援專線，兼且與D-Call Net 系統連線，不過嚟到香港都得物無所用。