BMW香港50周年慶典搞大佢！OpenCar

BMW香港50周年慶典搞大佢！

dman
26 Jul 2018
( 13 Comments)
825

BMW「JOY IS TIMELESS禮悅同行」活動正式啟動！

為慶祝50周年呢個重大日子，寶馬香港由今日開始到8月5日喺尖沙咀海港城同港威商場舉行「JOY IS TIMELESS禮悅同行」大型慶祝活動。呢次活動分成三大主題，分別係「Joy of Legacy」穿悅時空、「Joy of Sharing」悅享共賞、「Joy of Excitement」驚喜悅動。

其他展出嘅經典車款: BMW Isetta、BMW M3（E30）等等

位於港威商場嘅「Joy of Legacy穿悅時空」展區入面展出寶馬過去50年出現過嘅創新設計及經典車系，包括Isetta、M3（E30）、E9 3.0 CSi、840 CSi 、Z3及油電混能車i8 Roadster，不過講到呢次展品嘅焦點所在一定係被譽為寶馬M系始祖、專程由德國運抵香港嘅Turbo Concept概念車。呢部為慶祝1972年德國慕尼黑奧運會而設計嘅概念車來頭絕對唔小，全球只得兩部，更加係首次喺亞洲地區亮相，而且呢部絕版概念車對BMW廠方而言亦義意重大，除咗因為係由當時寶馬首席設計師保羅•布拉克（Paul Bracq）親自操刀設計之外，1972年同時係BMW位於幕尼黑總部落成嘅大日子。

全球只得兩部嘅Turbo Concept概念車空運抵港

講起呢部Turbo Concept，當年打著「渦輪增壓」旗號並且用上前衛嘅楔形車身設計、可翻折車燈以及鷗翼式車門，車身高度更只有1,100mm，可以媲美現今嘅超跑，設計獨特之餘又非常之有氣勢。如果車迷有興趣同呢架咁珍貴嘅車作近距離接觸可以先去寶馬香港50周年專頁內登記。

https://50.bmwhk.com/Joy_Is_Timeless/tc/

此外，現場設有經典寶馬模型車及精品專區，更特別推出BMW M3 1：64限量模型車款同埋50款紀念卡俾有興趣嘅朋友預訂同收藏。

50款紀念卡入面有以上10款係特別版，極具收藏價值

第二主題「Joy of Excitement驚喜悅動」展區則一連11日喺海運大廈展覽大堂舉行，呢個車展除咗可以欣賞全新登場車款X4外，曾經現身電影《職業特工隊：叛逆之謎》（Mission: Impossible - Fallout）中嘅M5同520 Deluxe Edition仲會現身呢次車展。此外，喺活動期間嘅兩個周末到場購買BMW皇牌入門型號新車（包括X1， 1系同2系）更設有唔少新車車展限定優惠，想買新車又想睇下靚車嘅朋友唔好錯過喇！

全新登場BMW X4

最後，呢次「JOY IS TIMELESS禮悅同行」活動除咗可以近距離欣賞寶馬各種珍貴車款之外，廠方亦非常細心，透過「Joy of Sharing悅享共賞」主題令到場參加活動嘅朋友只需登入寶馬香港50周年專頁，於三個區域打卡並完成指令後即可以換領限量禮品，齊齊分享寶馬香港50周年嘅喜悅。鍾意影相同自拍嘅朋友喺現場影相連同活動主題標籤#JoyIsTimeless上載至個人社交平台上，可獲贈BMW Turbo Concept手挽袋（Tote Bag）或扣針一個。

廠方當然冇忘記一班寶馬車主啦，佢哋只要憑網上登記啟動喜悅之旅獲得嘅QR Code 同時出示寶馬車匙，即可獲得車主專享禮遇套裝，包括Ralph Lauren免費換領咖啡1杯、百味堂免費換領雪糕1份連折扣優惠、海港城1小時免費泊車券及Dan Ryan’s、A Nu Retrouvez-Vous、Versace、Tissot、Bose、Tarmac及BMW精品折扣優惠券，以及BMW售後服務獨家優惠小冊子一份。每個登記車牌可換領禮遇套裝一份。