平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

星期二 學車易(第三回)

第三回: 死火及轉波

星期二 學車易(第三回)


試過極力子、Check埋盲點,做完一大輪事前準備功夫,終於可以開車!雖然第一回已經因為開車前鬆極力子過快而導致「死火」,不過死火原因又點會得一個?黎師父就話學車時最常見有三種情況會引致死火。第一種係揾磨擦點時過了火,過咗半離合位置;第二種係停定車前未落極力子;最後係轉錯波。學車時大多數時間都會喺一、二波之間遊走,不過問題嚟喇,師父話如果由一波轉去二波時,如果左手冇用力向左推,就有機會會由一波直接轉去四波,呢個情況下死火機會係9成9。


一百萬嘅問題:咩情況之下部車會死火呢? 答係:D,以上皆是。


如果考試時死火又係咪代表會即刻「肥佬」呢?黎師父就話唔係,考官會畀機會,當然死火次數唔可以太多,而死火之後點樣補救先係重點。考車時會因為過份緊張,有部分人死火後第一個動作就係踩低極力子,咁樣部車就有機會溜前或溜後。事實上,如果唔踩低極力子,死火之後波箱入面齒輪會支撐住部車令佢唔會溜走,反而更加安全,所以最緊要係先拉緊手掣,先固定部車,重新再做動作就可以,唔好因為死火而攪到手忙腳亂。


除咗死火之外,另外一樣揸棍波車必學嘅重點係--轉波。喺考試角度睇如果唔使轉波當然最好,但「一波」又點可以走天涯呢?所以就帶出今回另一個重點:轉波。首先,因為輕型貨車嘅引擎位於司機坐位下面,所以如果聽到引擎開始嘈就可以準備轉波,唔需要睇轉數。轉波前要先畀油加速,到合適位置(開始覺得嘈)就可以踩底極力子同時鬆油,手轉完波後再提起左腳,咁樣先叫完成整個轉波程序。當日學車時由一波轉去二波後會出現窒一窒情況,原因係當時我先縮油再踩極力子,而且踩極力子動作太慢,就會出現唔流暢情況。黎師父就寄語轉波踩極力子時要快、要狠、要一刀過,好似拍拖分手一樣,千萬唔可以拖。


轉波時踩極力子一定要夠狠,動作要一氣呵成,如果唔係轉波時會出現窒一窒嘅情況。


由一波轉二波時如果左手冇用力,咁就有機會由一波直接跳到落四波,咁就好大機會死火。



Text: Daniel

 覺得這文章有用?按下面的按鈕分享給你的朋友 

你可能感興趣的文章