平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

星期二 學車易 (最終回)

正式考試

星期二 學車易 (最終回)


過咗差不多10個月嘅時間,終於到正式考試嘅日子,考試當日前仲特別加操咗一輪,不過都係非常緊張,考試中途有幾下腳震到差少少吊唔到極力子。講返考試,今次嘅考試抽中咗2號路線,即係由嘉榮街出發,沿欣榮街、茶果嶺道、高超道、鯉魚門道,再去高超道最後返去嘉榮街考場,而且當日出奇地交通非常順暢,冇遇到咩阻塞。


考試結果雖然泊車同窄位掉頭(乙部試)順利合格,不過可惜丙部衰咗喺十大死因第一位之下。當時做完窄位掉頭返去高超道不過有死車喺左邊,我亦有打右邊指揮燈,不過考官就有留意到我扭咗軚先扭頭,所以送咗個嚴重錯誤我:超越物體沒有查看交通情況,所以就...肥咗!


丙部試衰咗喺十大死因第一位之下,不過乙部合格,算係有少少交代。


唔合格就當然要補考啦!決定補考之後可以喺考試日期7個工作天之後報名補考返上次唔合格嘅部分,例如我可以淨考丙部,而報重考可以有兩個選擇:第一個選擇係排快期,第二個選擇係排候試名單之末嘅考期(尾期)。


快期

每日朝早準時7點半開始可以用「先到先得」嘅方式透過運輸署連結網上報名(www.gov.hk/drivingtest)或者電話熱線(28668148)報名考快期,重考生可以申請由申請日起計7個工作天後至30個工作天內嘅重考生快期空缺。如果預約成功之後,考生可選擇親身或授權代辦人到指定牌照事務處或使用有效嘅個人電子證書去運輸署嘅網頁,確定考期同繳付考試費用。


網上報考重考要入嘅資料包括考試表格號碼/身份證號碼、出生日期、上次不及格嘅考試日期同埋日間聯絡電話號碼。


候試名單之末嘅考期(尾期)

如果選擇尾期可以網上或者親身去運輸署報名,而根據運輸署提供嘅「網上查詢駕駛考試輪候時間」,今日報考輕型貨車 (丙部試)平均輪候時間係141日,亦即是大概要等五個月左右。


只考輕型貨車丙部試要等接近5個月時間。


其實以上兩個辦法都各有好處同壞處,快期雖然可以快啲有期,不過我親自試過7點半報準時上快期網,但情況有少少似撲Sammi 演唱會飛一樣,F5極都入唔到個網,另外即使電話就算打得通,入到去佢都會話冇晒快期位。其實坊間都有地方可以畀錢人幫你代辦,不過詳情就唔係到討論。另外如果肯排尾期嘅好處係一定確保有位,不過就要等多五個月時間,但如果好趕住要個牌,排尾期就未必會適合你喇。


最後,今次雖然畀自己嘅陋習連累到肥咗佬,不過失敗乃成功之母,第二次希望會成功考到!




-----------------------

星期二 學車易合集


星期二 學車易(第一回): https://youtu.be/jOWh0-VvQHc


星期二 學車易(第二回):https://youtu.be/t-tFNKoOs-Q


星期二 學車易(第三回):https://youtu.be/cnAKkLdr2aw


星期二 學車易(第四回):https://youtu.be/KEMmrMTQXpM


星期二 學車易(第五回):https://youtu.be/epXa7ACKc3w


星期二 學車易(最終回):https://youtu.be/z8wkxKnaRgw



Text: Daniel

 覺得這文章有用?按下面的按鈕分享給你的朋友 

你可能感興趣的文章