品牌
继续
车类
继续
更多
继续
AMG頂級作品嘅Black Series，公佈第六位成員—AMG GT Black Series，但係相隔左咁耐大家都可能唔記得或唔知Black Series出過咩車，咁不如同大家回顧下過往十四年AMG為大家帶嚟嘅Black Series車系，了解下Black Series獨特之處。
元祖Black Series—SLK55 Black Series
時間去返2006年，AMG為咗擴充其業務於是成立「AMG Performance Studio」。「AMG Performance Studio」會為其下嘅AMG車款推出更強嘅Performance packages，同會為客人嘅AMG車輛進行個人化改裝。除此以外，仲會開發同生產限量嘅特別版AMG車輛，就係呢一刻誕生第一部SLK55 Black Series。
SLK55 Black Series 喺2006年尾公佈當年售價107,300歐元，作為第一部Black Series梗係有要求啦！所以一開始就用可以隨時落場跑、同提供到良好駕駛感覺，作為製作目標。
AMG將編號M118嘅5.5L V8引擎增強性能，用上新嘅風箱、風隔、高性能頭批，同再set過氣門正時，令原本360ps馬力提升到400ps馬力，油門反應更好。除咗增強引擎之外，梗係要幫架車減磅啦，所以AMG將SLK最出名電動硬頂開篷拆走，換咗做碳纖車頂，再加上重新設計嘅碳纖包圍，前泵把嘅進氣口同前沙板嘅出風口可以引入更多嘅空氣比機油、波箱同轉向系統嘅冷卻器，提升散熱效能，仲有嘅係將前後沙板加闊容納19吋AMG鍛造軨同前235/35ZR 19、後265/30ZR19輪胎，令到減輕重量嘅同時，轉彎性能同穩定性都提高。
搞咗馬力同重量，梗係要搞埋個底盤啦。AMG就換咗可以調校嘅避震、高性能嘅迫力系統同19吋鍛造軨。以上改動令到SLK55 Black Series比起普通嘅SLK55輕咗足足45kg。
廠方冇講明SLK55 Black Series限定幾多部，不過可能因為新車價太貴，搞到生產數量唔多，得120部，當中只有少量右軚。不過而家有錢都賣唔到，因為市場上冇盤放緊，想儲下Black Series嘅朋友可能要等下喇。
DTM同F1 Safety Car共冶一爐—CLK63 Black Series
CLK63 Black Series喺2007年公佈當年售價100,000歐元，呢款車建基F1 Safety Car CLK63 AMG而成，利用F1 Safety Car CLK63 AMG嘅製作經驗，再加以改良用落CLK63 Black Series。
車身繼承咗F1 Safety Car用心設計嘅包圍再加以改善，有效改良導風，令波箱同轉向系統嘅冷卻器散熱效能更加好，亦可以用更加闊嘅前265/30R19、後285/30R19輪胎。為咗將部車減磅，AMG就將後座拆咗佢，前座用賽車桶座，加上改配19吋AMG鍛造軨，令總車重下降到1,765kg。
AMG將編號M156 V8引擎重新寫過電腦，加埋新嘅進氣同排氣系統後，馬力提升至507ps，最大扭力63kgm。波箱方面，改變咗AMG SPEEDSHIFT 7G-TRONIC波箱嘅尾牙系數，令0-100km/h只需要4.3秒，極速去到300km/h（電子限速）。底盤就換咗可調校嘅避震，而加速防滑控制（ASR）同電子穩定程式（ESP）就重新調校，令部車操控極限提高。迫力系統就改用前360mm後330mm嘅通風碟。
可能受到當年DTM同F1 Safety Car CLK影響，喺2007年4月至2008年3月期間，全球生產咗了700部，現時外國二手市場平均價格落喺110-140萬港紙之間。
唯一採用V12—SL65 Black Series
SL65 Black Series喺2008年公佈，當年售價327,250歐元，AMG Performance Studio同HWA Engineering將原本已經夠哂勁嘅SL65 AMG再推上另一個層次，令SL65 Black Series成為真正怪物。
同之前一樣，AMG工程師會用盡心機將部車偷輕，將多餘嘅嘢拎走，所以第一時間用大量嘅碳纖維車身部件，更將電動開篷硬頂換成碳纖硬頂，令到部車輕咗成250kg咁多，車重下降至1,870kg。極誇張嘅包圍係為咗有更好嘅空氣動力同冷卻性能，拋沙板嘅設計令部車裝到前265/35R19、後325/30R20嘅胎軨，而尾翼喺120km/h時更會升高12cm，增加下壓力令部車行高速嘅時候更加穩定。
動力系統方面，AMG今次做咗唔少功夫，將副M279 AMG V12再升級換上更大嘅Turbo，改善咗進氣同排氣系統，而新嘅冷卻器系統更可以令進氣溫度降低30%，令引擎行得更加有效率。以上改動令最大馬力增加至670ps，最大扭力更達122kgm！但車廠考慮到日常使用嘅耐用性，所以將扭力調低到102kgm。此外，為咗要對應返咁勁嘅扭力，車廠當時都要忍痛唔用最新嘅AMG SPEEDSHIFT MCT 7速波箱，要用返可以承受大扭力嘅AMG SPEEDSHIFT PLUS 5速波箱，並提供C、S、M1及M2四種模式。
咁強勁嘅馬力同扭力，令部車0-100km/h只需要3.8秒，極速320km/h（電子限速），但係要做到3.8秒呢個數字都唔係咁簡單，因為就算用咗325/30R20嘅車胎，加上有電子穩定程式（ESP），盡油加速下都會出現跣胎嘅情況，可想而知呢副V12有幾誇張！
為要控制咁強勁嘅輸出，AMG喺底盤都落咗唔少心機，工程師為咗開發比SL65 Black Series用嘅可調校懸掛系統，特別喺Nurburgring行咗接近10,000km。另外有三段式電子穩定程式（ESP），令車主可以調校成啱自己嘅駕駛設定。迫力系統用咗頭6活塞、尾4活塞卡鉗，配前390mm、後360mm迫力碟，前迫力仲有導風管幫手散熱。除此之外AMG仲為差速器裝咗兩個冷卻器，以上設定已經可以令車主隨時落場飛！
SL65 Black Series喺2008年9月到2009年8月期間，總共生產咗350部，當中美國佔咗一半數量，其餘175部就分散咗去唔同地區，現時外國二手市場平均價格落喺220-250萬港紙之間。
應用賽車經驗而成—C63 Coupe Black Series
C63 Coupe Black Series喺2011年7月嘅F1德國大獎賽中公佈，當年售價115,430歐元，AMG將喺賽車上得到嘅經驗用落喺C63 Black Series，展示AMG新嘅理念「Driving Performance」。
C63 Coupe Black Series喺外觀上延續Black Series一定會有嘅拋沙板造型，前泵把入氣口設計係為咗引入更多嘅空氣供冷卻器，加闊咗嘅沙板可以容納19吋AMG鍛造軨，同埋前255/35R19、後285/30R19輪胎。尾泵把外型設計就參考咗SLS AMG GT3，再加上尾擾流增加行車時嘅穩定性。
今代C63 Coupe Black Series最特別係有Option俾你揀！你可以選擇要兩張固定桶凳同拆咗後座減輕重量，又或要返四座位但係冇咗對固定桶凳。另外，仲可以加「Track Package」同「Aerodynamic Package」嚟增強部車嘅戰鬥力。價值5890.50歐元嘅「Track Package」有為C63 Black Series開發嘅Dunlop胎，同埋差速器裝咗主動式冷卻器，以應對長時間嘅激烈駕駛。而價值7973歐元嘅「Aerodynamic Package」就為本身嘅包圍錦上添花，加上碳纖風刀同可調校嘅碳纖尾翼。如果買得Black Series嘅話都冇咩理由唔加呢兩個Package啩？
AMG為C63嘅M156 V8引擎再度強化，用咗鍛造活塞，精密平衡過嘅鍛造曲軸同鍛造連桿，以上技術都係嚟自SLS AMG，再加埋AMG工程師再調整，令最大馬力提升至517ps，最大扭力63.2kgm，0-100km/h只需要4.2秒，極速300km/h（電子限速）。為咗更加有效率降低機油嘅工作溫度，換咗SLS AMG嘅機油冷卻器，波箱就用AMG SPEEDSHIFT MCT 7速，並有四種模式C、S、S+及M選擇，其中嘅S+同M模式轉波速度最快只需要0.1秒。
C63 Coupe Black Series用上AMG可調校懸掛系統，可以因應路面狀況再進行設定，換咗改良過嘅車底拉桿，前、後輪距分別增加40mm同79mm，迫力系統就用上AMG重新開發嘅頭6活塞、尾4活塞卡鉗，配前390mm、後360mm迫力碟。三段式電子穩定程式（ESP），再加上重新設定嘅防鎖死剎車系統同速度感應式轉向系統，種種改良都令部車有更加好嘅操控性。
廠方原意只生產650部C63 Black Series，但由於太受歡迎所以加碼到800部，如果想入手Black Series 車系，C63 Black Series係一個唔錯選擇，因為本身售價唔高同產量多嘅關係，外國二手價錢一直喺120-130萬港紙之間。
GT3賽車街車化—SLS Black Series
SLS Black Series喺2013年6月正式推出市場，當年售價249,900歐元，AMG將用喺SLS AMG GT3嘅技術轉移到SLS Black Series，所以話SLS Black Series係街車版SLS AMG GT3都無錯。
外觀設計靈感嚟自SLS AMG GT3再由AMG重新設計，前、後沙板分別加闊10mm同25mm，足以容納前275/35R19、後325/30R20輪胎，同埋SLS Black Series先有嘅啞黑色AMG鍛造軨。前泵把嘅碳纖頭唇同後泵把尾擾流，可以令氣流更加流暢通過車底，產生更大嘅下壓力令部車喺高速時更加穩定。此外，工程師更將前泵把嘅入氣口、前沙板嘅出風口整大，配合碳纖頭冚中間開咗個出風口，有效降低引擎嘅工作溫度。
今代SLS Black Series都有AMG嘅「Aerodynamics Package」，為部車加咗前風刀同一隻可調校碳纖尾翼，裝咗之後部車有更好空氣動力，從而提升轉彎表現。
AMG將SLS AMG原有嘅M159 V8引擎再升級，換咗重新設計的氣門齒輪、凸輪軸，同埋挺桿上咗賽車引擎用嘅塗層，將引擎轉數由原本7,200rpm推上8,000rpm。為咗要應對返高轉數引擎，其他零件都有強化，如新嘅進氣管、重新set過嘅皮帶傳動系統、強化曲軸部份，同改善水、油溫冷卻系統。除咗升級引擎之外，AMG仲開發全新嘅排氣系統，首次採用鈦金屬，重量得17kg。做咗咁多改動令引擎最大馬力去到631ps，最大扭力63.5kgm。0-100km/h只需要3.6秒，極速315km/h。
為咗改善重心，AMG SPEEDSHIFT DCT 7-speed sports波箱裝設位置下降10mm，再用氣壓桿將波箱連接到底盤，減少震動同左右搖擺嘅影響。AMG仲為波箱加咗一個叫「Temporary M」嘅模式，如果用緊C、S或S+模式，突然想轉用M手動模式，只需要撳一下軚盤撥片，就會自己變做M模式。閒置一陣，系統就會根據駕駛情況，幫你轉返去之前用緊嘅模式。
AMG工程師為SLS Black Series嘅底盤落咗唔少功夫，有新嘅「AMG RIDE CONTROL」懸掛系統，有Sport同Sport+兩種模式可以隨時校避震軟硬，前、後輪距分別增加20mm同24mm，有改良嘅速度感應式轉向系統同碳纖維傳動軸。AMG同時裝咗新嘅電子式鎖定差速器，喺加速或者減速嘅情況下，可以提供到一個可變嘅鎖定率，令轉彎時嘅穩定性更加好。迫力就用咗前402mm、後360mm陶瓷迫力碟及更耐熱迫力皮，減輕熱衰竭嘅情況。
以上改動令SLS Black Series輕咗成70kg，總重只有1,550kg。1,550kg車重再加上AMG調校過嘅引擎同底盤，令SLS Black Series喺Nurburgring嘅圈速只需要7:25.67，快過同期嘅Ferrari 458同McLaren MP4-12C，當年嚟講都算唔錯。
SLS Black Series限量350部，如果你想用返當年新車價買返都無咩可能，因為一部高質素SLS Black Series賣緊500萬港紙，不過考慮身為Black Series罕有程度同埋係SLS嘅身份，未來價錢都係應該得過升字，所以快啲入手啦！
Text：Hin
覺得這文章有用？按下面的按鈕分享給你的朋友
你可能感興趣的文章
16 Jul 2021
14 Jul 2021
18 Jun 2021
10 Jun 2021
07 Jun 2021
