JDM大市分析！話你知下一次升邊部！

• hin
• 18 Jun 2021
• ( 13 Comments)
• 7152

何解JDM（Japanese Domestic Model）價值會升得咁誇張？仲要升得快過樓？揸住賣都唔會輸？相信呢啲問題好多朋友都想知點解。既然係咁，今次就同大家分析下，「點解JDM會變到咁搶手」。

JDM升得有幾誇？

先同大家回顧返近年最具代表性、價值上升得最勁、最誇嘅JDM車款先，有Subaru 22B，MitsubushiI Evo 6.5、Nissan Skyline GT-R R34 V-SPEC II Nur同Honda NSX Type R NA2，以上四部相信係近年升幅最大嘅JDM。例如一部行咗40,000-50,000km、質素唔錯嘅22B，喺2017年時售價約$600,000港紙，但到咗今年已經成交咗$2,400,000港紙，而R34 V-SPEC II Nur同 NSX Type R NA2，由2017年千幾萬日元到咗而家要三千幾萬日元，咁你話誇唔誇張？

22B喺美國以312,555美元售出

你可能會話：「唓！呢四款都係啲限量版本JDM，所以升幅先咁大啫！」你咁諗就錯喇，普通版本嘅JDM一樣升！如S2000、Integra Type R、Civic Type R系列，同埋Skyline GT-R系列等JDM，係呢幾年二手市場價格都有明顯增幅，如一啲質素企理、行車咪數約100,000km嘅EK9同DC2，喺2017年可能$100,000港紙左右已經玩到，但到咗而家想搵返一樣質素，已經要成$200,000-$300,000港紙。

點解可以咁搶手？

上世紀七十至九十年代可以話係日本汽車製造業進軍世界嘅時期，其中九十年代就係最輝煌嘅時期，各車廠用盡資金推出高性能車款宣揚自家造車技術，令大量經典車款出現，但可惜九十年代中受到泡沫經濟爆破，以及環保問題，令當地人用車需求大減。喺暢銷車款都唔賣得嘅情況下，被視為奢侈品嘅高性能車款，只會成為車廠絆腳石，令Skyline GT-R、NSX、RX-7、Supra，Celica等著名高性能車款都先後遭受停產命運。

雖然到咗現時呢啲車款都回歸車壇，但係因為時代嘅需求同進步，新款與舊款相比多咗好多電子系統輔助，更致命係大多數新款車只有自動波或混能引擎，根本冇得揀！雖然Supra、NSX同GT-R都後繼有人，但就同一眾車迷想要嘅嘢有好大出入，三款車中冇一款有棍波俾你揀，更令人失望！所以車迷們都會搵返上一世代嘅JDM玩，間接令JDM價值上升。

法例推波助瀾

「古董車輛豁免驗廢氣」呢個原因相信係令近年JDM車價升幅大增嘅原因。喺香港，你部古董車只需要有二十年車齡就可以豁免驗廢氣，屈指一算呢個二十年嘅門檻，終於輪到好多人認識嘅JDM，如S2000、GT-R R34同S15等，令到好多人想搵返自己嘅童年回憶，或想體驗一下呢啲JDM。香港人一向有鋪喺日本買嘢嘅癮，要搵JDM當然就喺日本市場瘋狂引入啦！香港人雖然唔多，但香港嘅JDM買家就間接令JDM價格提高！你可能以為我講得誇張咗，但係你真係唔好睇小香港呢個地方，香港人喺日本買JDM嘅數量已經多到有日本傳媒報導！

題外話，有一點唔好誤會，雖然係豁免咗驗廢氣呢一part，但喺部車要出牌大驗嗰陣，都係要符合返運輸署嘅驗車標準先可以出牌。

講完香港就到美國喇，美國嘅廿五年規則就同香港有少少唔同，只要部車車齡已經廿五年嘅話，喺美國就會變咗做經典車輛，一但成為咗經典車輛就唔使符合聯邦機動車輛安全標準（FMVSS），連右軚車都可以喺街上面行，所以呢個都係美國對JDM市場需求大增原因之一，而今年2021年可以入Evo III、GT-R R33同DC2 Type R等車款，如果係搵緊以上JDM嘅你，要搵就快喇，因為你又多個競爭對手喇！

睇得多就更想買

相信有唔少車迷年青嘅時候已經睇關於車嘅漫畫同電影，由此令到車迷認識更多汽車。電影代表有《狂野時速》系列，每一集都有大量日本跑車出現，而當中由Paul Walker駕駛嘅Supra同GT-R R34令影迷更加留意呢兩款車，間接令Supra同GT-R R34價錢上升。而漫畫《頭文字D》同《灣岸競速》相信都唔使我點講，AE86同S30Z呢兩款主角車已經因為受到漫畫影響，價錢一年比一年高，甚至出現供不應求情況。好似第一代Fairlady Z喺日本叫S30/31Z，已經有人要喺外國搵返240、260或280Z逆輸入返日本。而AE86 Sprinter Trueno 3 door仲誇張，喺日本只要一登上二手車網站，就極速被人買咗，可見漫畫或電影可以影響一款車嘅價值有幾大。

供應同需求

近年個個都要搵JDM，但唔好彩嘅係大家想搵嘅JDM已經停咗產好耐，唔會再出，呢個時候自然會出現最基本嘅「供過於求」問題喇。本身高性能車款嘅JDM生產數量已經唔多（DC2 Type R得29,995部，EK9 Type R得15,910部），仲要加上有啲可能已經唔存在喺世界上，實際數量可能更少，喺咁多人搵嘅情況下，價錢自然就愈來愈貴。

綜合以上原因，呢幾年JDM價值向上升絕對唔係一朝一夕嘅事，其實都係集合天時地利人和，先開始爆發JDM熱潮。

仲有咩車會升？

Subaru Impreza WRX STI GDB

Impreza WRX STI GDB相信係Subaru繼GC8之後，近年升值最快嘅車款之一，隨住EJ20呢副經典水平對向引擎停產，間接令日版Impreza WRX STI GDB價錢向上升，如果你係有少少財力嘅朋友，不妨考慮下Impreza WRX STI GDB特別版本，如S系列、SPEC C同KEN哥都讚好嘅RA-R(有片有真相)，以上系列都係Subaru對Impreza WRX STI用心之作，同埋好多都只作限量發售，大大提升稀有程度，趁而家價錢唔算太貴，就快啲入手啦！

Nissan Skyline R34 GTT

你見到呢個Skyline R34可能以為講笑，但係你冇睇錯，點解我會話Skyline R34會升？因為都係GT-R R34嘅錯！GT-R R34嘅價錢已經升得太誇張，所以車迷都將目標轉向定位次一級、採用RB25DET引擎嘅 Skyline R34 GTT，所以有理由相信Skyline R34 GTT 價錢會繼續上漲。

TOYOTA BB Open Deck

講咗兩架都係跑車，咁都要講下其他趣味性大啲嘅車，我推介BB Open Deck。BB Open Deck當年為咗年輕人市場而推出，一向設計保守嘅Toyota，竟然會為BB加上Pickup風格同有當時好少見嘅對開式車門，可惜嘅係日本市場就唔係太受歡迎，所以只生產兩年就結束咗Open Deck呢個系列，市場流通量一定唔會多，如果搵到一部質素唔錯嘅都可以入手一部玩下，相信有一定嘅保值同升值能力。

以上三部都係我自己個人推介，當然日本仲有大量JDM車款俾大家揀，如果你仲想用合理價錢玩JDM，咁就要快手喺日本搵返部自己鍾意嘅JDM喇！

 覺得這文章有用？按下面的按鈕分享給你的朋友 

你可能感興趣的文章

5/8 至8/8 會展荷花展再有優惠...

• 專題
• 14 Jul 2021