平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

今個週末繼續「we we聲」鬥車

新增ATTACK MODE更似打機

全名ABB 國際汽聯電動方程式賽車錦標賽(簡單講即係Formula E)到今年已經嚟到第五屆嘅賽季,今季總共有13場比賽,地點遍佈五大洲、比賽有11支車隊、22位車手參加,焦點車手除咗繼續有上季總冠軍Jean-Eric Vergne 同上屆香港分站冠軍Sam Bird之外,仲有今季首次參賽、前F1 重量級車手Felipe Massa添!


雖然正賽會喺3月10日(星期日)舉行,不過3月9日(星期六)公眾其實都歡迎去現場睇比賽同埋參觀喺隔離嘅Allianz E-Village。


新增兩隊車隊參賽

香港作為今屆第五個分站,雖然唔會同上屆一樣有雙賽事進行(兩場獨立嘅賽事),不過今屆新增BMW同Nissan兩支車隊加入鬥車,而且今屆仲係第一次使用新一代Gen2戰車比賽,肯肯定會令賽事變得更好睇、更具競爭性。


上屆香港分站冠軍Sam Bird(左下)今年唔知可唔可再下一城呢?


中環海濱區鬥車

今次比賽地點同之前兩屆一樣喺中環海濱區進行,賽道全長1.86 公里,總共有10個彎位,途中會經過國際金融中心二期、香港摩天輪等嘅地標。不過講到整條賽道最正嘅一定係過咗第一個彎位、有555米,龍和道果條大直路。


賽道全長1.86 公里,總共有10個彎位。


新加入Attack Mode

今屆比賽規則同之前唔同,比賽要鬥 45 分鐘加一圈,即車手要鬥足45 分鐘之後再鬥多一個圈先算完成賽事。因為賽事入面唔會再容許換車比賽,喺新嘅比賽方式底下,會考驗到各車隊落場嘅作戰策略,例如點可以好好運用剩底嘅電力去完成比賽等等。除此以外,今年比賽入面仲新增「進攻模式」(ATTACK MODE) ,車手去到賽道入面指定嘅激活區就可以得到額外5kW動力,令戰車最大動力由220kW提升去到225kW。而車迷依然可以繼續參與投票,令得票最多嘅3位車手可以額外使用5秒時限嘅100kJ動力嘅FANBOOST,所以唔係得個睇字咁「齋」。


二代戰車登場

上面提到今屆會用新車作賽,咁到底新車同上一代有咩分別呢?車身加長咗160mm(總長度5160mm),窄咗10mm(新闊度:1770mm),電摩打最大輸出有250kW,比之前多咗50kW,轉換返傳統計式即係有335匹。除咗摩打勁咗,連帶車入面嘅電池都提升唔少,儲電量比之前多出差唔多一倍,而最大電流量有54kWh。種種因素加埋令新車嘅表現強化咗,0-100km/h 加速時間只要2.8秒就完成,極速更加有280km/h。提提大家,因為車嘅儲電量多咗,以前車手喺維護站入面要鬥快換車嘅情景已經唔會再見到,只會見到各車手用同一部車由頭鬥到尾。


強代咗嘅gen2戰車,一部車嘅電容量已經可以應付整場賽事。


Allianz E-Village

大部份重要嘅賽事都集中喺星期日進行,例如排位賽同埋正賽都會喺當日完成。即係星期六可以唔去?當然唔係啦,星期六雖然戲碼唔及星期日咁勁,但電動方程式賽車又唔係淨係得賽車睇嘅,有興趣入場嘅觀眾可以買飛進入賽道旁邊嘅Allianz E-Village,入面除咗可以了解更多有關街道電動賽車系列嘅歷史同資訊之外,大會亦會喺唔同時段預備娛樂活動節目畀觀眾,例如電動方程式車手簽名環節、當代武術表演、面部彩繪等等。


入去Allianz E-Village前需要買飛,票價$ 50,想買飛嘅朋友可以去Ticketflap購買門票。


至於呢個週末到底中環現場會有幾好玩?新一代戰車會有幾勁?有興趣嘅車迷記住留意我哋OpenCar當日現場報道喇!


Text: Daniel

 覺得這文章有用?按下面的按鈕分享給你的朋友 

你可能感興趣的文章