平治
奥迪
宝马
奔驰
电动车
货车
客货车
私家车
座位
容積
傳動
年份
是否已售

想買張BB櫈喺車用要點揀好

《OpenCar》教你揀張啱你嘅BB櫈

《OpenCar》教你揀張啱你嘅BB櫈


香港法例規定,2歲或2歲以下嘅兒童坐喺私家車前座時,必須使用認可嘅兒童安全帶裝置;至於坐喺私家車後座嘅兒童,如果座位已安裝兒童安全帶裝置,同樣需要配戴。不過現時法例並無規定私家車後座必須安裝兒童安全帶裝置,另一方面,成人安全帶又未必適合小朋友。根據外國研究結果顯示,配戴兒童安全帶裝置之後,兒童喺意外當中受到嘅傷害係可以減低,但要點係先要搵到一張適合你部車同BB嘅汽車兒童座椅呢?臨近4月4號兒童節,今次就等《OpenCar》同你介紹一下!


Step1 你部車

叫得上汽車兒童座椅(BB櫈),第一樣要求梗係你部愛車啦!依家嘅新車特別係歐洲車,好多都有個叫「ISOFIX」裝置,因為有啲國家已經將「ISOFIX」列入為標準配備。咁到底咩係「ISOFIX」呢?其實「ISOFIX」係一個由國際標準化組織所制定嘅固定兒童安全座椅裝置標準,現時好多歐洲車廠都用緊呢個標準,喺歐洲係相當普遍嘅安裝方式,主要係透過兒童安全座椅上面兩條鋼條同車上固定器結合,就好似平時將電插頭插入插座咁簡單,可以快速而且穩定咁固定兒童安全座椅。 不過,如果你部車冇「ISOFIX」都唔緊要,因為市面上嘅兒童安全帶裝置有部分可以用返你車入面三點式安全帶㗎!


車上面「ISOFIX」插槽外會有「ISOFIX」標誌,清楚話你知插槽位置。


Step2 你個小朋友

講完你部車,輪到講你個BB喇,佢嘅重量同年紀都會直接影響你買邊款兒童安全座椅條件,香港市面上嘅兒童安全座椅大概可以分三種。


Group 0+ 嬰兒安全座椅

佢係畀1 歲或以下嬰兒又或者唔可以自己坐穩嘅初生BB用(大概體重由0至13公斤)。由於初生BB脊椎好脆弱,所以最好以「後向」方式安裝,即係BB面向車尾,發生意外時安全座椅就可以吸收撞擊力。部分呢類型嘅安全座椅唔可以獨立固定喺車入面,所以設計上會多咗一個座,座入面會有一隻支撐腳,用嘅時候可以向下頂住後座地板,呢種設計作用係當意外發生時可以減低BB被向前拋力度。不過如果你架車成日都坐滿人嘅話,呢個設計就冇咁方便啦。


Group 0+嬰兒安全座椅係畀初生BB用,上面呢款搖籃式設計可以方便父母連BB櫈咁樣帶出街,上車將張櫈裝返去底座就可以喇。


Group 1 兒童安全座椅

適合 9 個月至 4 歲幼童(體重大概9-18公斤),呢類兒童安全座椅同樣可以向後安裝,而且部分款式有5點式安全帶,咁就可以提供更加好嘅保護。


部分兒童安全座椅嘅設計會有5點式安全帶固定小朋友,再用「ISOFIX」及三點式安全固定張櫈。


Group 2/3 兒童安全座椅

要有效咁樣提供保護,小朋友嘅頭部一定要喺兒童安全座椅入面,呢類適合約4至12歲兒童(體重由15到36公斤)用兒童安全座椅,好多都可以調校頭枕高度,咁嘅設計就啱晒喇,因為咁就可以應付小朋友喺唔同年紀身高。


呢款Group 2/3 兒童安全座椅頭枕高度可以自己調較(A-L)咁就可以一直用到小朋友用成人安全帶喇!


再大個啲嘅小朋友又可以用咩座椅? 咁大個仔,就梗係可以用返成人安全帶喇!


Step3 安裝

搞掂以上兩個項目,買咗返嚟咁點樣裝呢? 用「ISOFIX」肯定最快同最簡單,就咁插入去就攪掂又夠晒穩陣。


依家假設我哋要喺車嘅後座安裝支援「ISOFIX」嘅兒童安全座椅,喺椅背同坐墊之間會發現一個插槽,呢個插槽有機會唔係咁明顯,不過亦都有啲車款(特別係新歐洲車)會喺「ISOFIX」插座嘅外殼或者櫈上印上「ISOFIX」標誌。當你搵到「ISOFIX」 插槽之後,將兒童安全座椅果邊嘅勾,勾住插槽就得,固定好張櫈之後就可以畀你小朋友坐入去。


支援「ISOFIX」嘅BB櫈,安裝起上嚟真係輕鬆好多,只要搵到「ISOFIX」插槽,對準後安裝已經好穩陣。


頭幾次安裝係會有少少難度,不過可以比個貼士大家,將兒童安全座椅果邊嘅「ISOFIX」鋼條拉到最盡,之後對準兩邊插槽,咁就會易裝好多,記住一定要聽到「咔」一聲先代表安裝穩陣,如果唔係就會失去功用。


見過有人問,到底BB櫈係咪唔可以放喺前座呢?唔係,不過首先你要熄咗個氣袋。千萬唔好就咁抱住小朋友,或者坐喺膝頭就算,因為如果發生意外,小朋友會被夾喺大人同儀錶台之間,又或者有機會被拋出車外面,要帶小朋友坐車,都係用返兒童安全帶裝置啦。


部分車款前座乘客座位嘅氣袋係可以手動閂咗佢,不過亦有部分車款要返廠先熄到,因為始終會涉及到安全事項,熄之前最好先係諗清楚。


其實大部分安全座椅旁邊都會有圖示教你點樣安裝,特別係要用到傳統三點式安全帶嘅BB櫈,安裝時會比較麻煩同埋複雜,記緊要睇清楚!


我哋上面都係舉例某幾款車,同埋唔同型號BB櫈都可能會唔同,事前最好都係睇返你部車嘅車主手冊同BB櫈說明書!


Text: Daniel

 覺得這文章有用?按下面的按鈕分享給你的朋友 

你可能感興趣的文章